لاہور میں وقفے وقفے سے جاری بارش کے دوران ٹھوکر نیاز بیگ کے علاقے مریدوال گاؤں میں ایک کچے مکان کی چھت گرنے سے 5 افراد جاں بحق اور 2 زخمی ہو گئے۔
واقعہ رات کے وقت پیش آیا جب تمام افراد مکان کے اندر سو رہے تھے۔
افسوسناک سانحے کی تفصیلات:
ریسکیو 1122 ذرائع کے مطابق چھت گرنے سے تمام پانچ افراد ملبے تلے دب کر دم توڑ گئے، جبکہ دو افراد زخمی حالت میں نکالے گئے۔
جاں بحق افراد میں دو خواتین، دو کمسن بچیاں، اور ایک بزرگ مرد شامل ہیں۔
جاں بحق افراد کی شناخت:
60 سالہ مانگا
55 سالہ عشرت بی بی
35 سالہ رانی بی بی
3 سالہ خدیجہ
4 سالہ لطیفہ
جاں بحق افراد کی لاشیں جناح اسپتال لاہور منتقل کر دی گئیں۔
زخمی افراد:
30 سالہ فیصل
5 سالہ ببلی
زخمیوں کو بھی فوری طور پر جناح اسپتال منتقل کر کے طبی امداد فراہم کی گئی۔
حال ہی میں تعمیر شدہ مکان:
واقعہ کی ایک اور افسوسناک پہلو یہ ہے کہ مکان کی تعمیر صرف 20 روز قبل مکمل ہوئی تھی۔چھت بانس، مٹی، اور سرکی سے بنائی گئی تھی، جو بارش کا دباؤ برداشت نہ کر سکی۔متاثرہ خاندان نے ایک ماہ قبل ہی یہ جگہ خریدی تھی اور اس کچے مکان میں منتقل ہوا تھا۔
اہل علاقہ اور ریسکیو کارروائی:
مقامی افراد نے ریسکیو ٹیموں کے ساتھ مل کر ملبہ ہٹانے میں مدد دی۔واقعے کے بعد علاقے میں فضا سوگوار ہے، اہل محلہ کی بڑی تعداد اسپتال اور جائے حادثہ پر جمع ہو گئی۔
