وفاقی وزیرِ اطلاعات عطاء اللّٰہ تارڑ نے پاکستان تحریکِ انصاف (پی ٹی آئی) کو چیلنج کیا ہے کہ وہ بانی پی ٹی آئی عمران خان کے ذرائع آمدن کی تفصیلات سامنے لائیں، اور سوال کیا کہ لاہور میں 25 کروڑ روپے کا گھر کیسے بنایا گیا اگر ان کے ذرائع آمدن نہیں ہیں۔
عطاء تارڑ نے ایک پریس کانفرنس میں کہا کہ پی ٹی آئی کے دورِ حکومت میں کابینہ کے بند لفافے کی منظوری دی گئی، جس سے عمران خان نے اربوں روپے کمائے۔ ان کا کہنا تھا کہ پی ٹی آئی نے اپنے دور میں جھوٹے کیسز بنائے اور بانی پی ٹی آئی، بشریٰ بی بی اور فرح گوگی کے ہاتھ کرپشن میں رنگے ہوئے ہیں، اور ان لوگوں کو اپنے اعمال کا جواب دینا ہوگا۔انہوں نے یہ بھی کہا کہ مذاکرات کے عمل میں کرپشن اسکینڈلز پر بات نہیں ہو سکتی، اور مذاکرات کا یہ تاثر نہیں لیا جانا چاہیے کہ اربوں روپے کی کرپشن پر پردہ ڈال دیا جائے گا۔ عطاء تارڑ نے مزید کہا کہ 190 ملین پاﺅنڈ کا کرپشن کیس ٹرائل کورٹ میں چل رہا ہے اور اس میں ناقابلِ تردید ثبوت فراہم کر دیے گئے ہیں۔
ان کا یہ بھی کہنا تھا کہ کرپشن کیسز کا مذاکرات سے کوئی تعلق نہیں۔عطاء تارڑ نے ملکی اقتصادی معاملات میں سپہ سالار کے کردار کی تعریف کرتے ہوئے کہا کہ معاشی استحکام سیاسی استحکام سے جڑا ہوا ہے، اور اس ضمن میں سپہ سالار کی کوششیں قابلِ تحسین ہیں۔
