نہر میں تیرتا ریسٹورنٹ منصوبہ’’ ڈوب‘‘ گیا

  ریسٹورنٹ کی تعمیر کیلئے 35کروڑ اور شپ کی تعمیر کیلئے فنڈز درکار ہیں تاحال اجرا نہ ہوسکا 
لاہور (کرائم رپورٹر)پی ایچ اے فلوٹنگ ریسٹورنٹ بنانے کے لیے حکومت کی ایک اور کوشش، آئندہ ماہ کے پہلے ہفتے میں کنٹریکٹر کو ورک آرڈر جاری کیا جائے گا، حکومت کی طرف سے تاحال مکمل فنڈز نہ دیئے گئے، دوسری جانب ریسٹورنٹ کی تعمیر کے لیے نہر کے احاطے کے مسائل آنے کے بعد ڈیزائن کے مسائل بھی آنا شروع ہوگئے، ذرائع کے مطابق پارکس اینڈ ہارٹی کلچر اتھارٹی کی طرف لاہور میں اپنی نوعیت کا منفرد اور پہلا فلوٹنگ ریسٹورنٹ نہر میں بنانے کا مجوزہ پلان بنایا گیا، نہر میں پہلا فلوٹنگ ریسٹورنٹ بنانے کا منصوبہ مسائل کے بھنور میں پھنستا جارہا ہے، فلوٹنگ ریسٹورنٹ کو بنانے میں پے در پے مشکلات آرہی ہیں، نہر کے احاطے کے مسائل آنے کے بعد ڈیزائن کے مسائل بھی آنا شروع ہوگئے. پی ایچ اے انتظامیہ نے مئی کے پہلے ہفتے میں ہی فلوٹنگ ریسٹورنٹ کی تعمیر کے لیے نجی کمپنی کو ٹینڈر ایوارڈ کرنے کا فیصلہ کر لیا، نیسپاک کی طرف سے فلوٹنگ ریسٹورنٹ کے ڈیزائن کو بھی منظور کر لیا گیا ،تاہم حکومت کی جانب سے تاحال فنڈز کا اجرا نہیں کیا گیا، فلوٹنگ ریسٹورنٹ کی تعمیر کے لیے پینتیس کروڑ اور شپ کی تعمیر کے لیے فنڈز درکار ہیں لیکن حکومت کی طرف سے تاحال فنڈز کا اجرا نہیں ہوسکا جو فلوٹنگ ریسٹورنٹ کی راہ میں رکاوٹ ہے، ذرائع کے مطابق پی ایچ اے کے پاس تاحال کوئی چیف انجینئر موجود نہیں۔پی ایچ اے انجینئرنگ ونگ پانچ کروڑ سے زائد کی سکیموں کی منظوری نہیں دے سکتا، پی ایچ اے فلوٹنگ ریسٹورنٹ منصوبے کا تخمینہ 35 کروڑ لگایا گیا ہے ،تاہم پی ایچ اے کی طرف سے ٹینڈر جاری کرکے مبینہ طور پر  قوانین کی خلاف ورزی کی جارہی ہے۔