ایک اور میثاق جمہوریت تک صورتحال تبدیل نہیں ہوسکتی: رانا ثنا اللہ

سیاسی مسائل صرف اس وقت حل ہوں گے جب سیاسی قیادت  مذاکرات کیلئے ٹیبل پر بیٹھے گی
پی ٹی آئی  والے سمجھتے ہیں   سیاسی مسائل کو اسٹیبلشمنٹ سے گفتگو کرکے حل کرلیں گے:مشیر وزیراعظم
   اسلام آباد (آئی این پی )وزیر اعظم کے مشیر اور مسلم لیگ  (ن ) کے سینئر رہنما رانا ثنا اللہ نے کہا ہے  پی ٹی آئی سمجھتی  ہے کہ سیاسی مسائل کو اسٹیبلشمنٹ سے گفتگو کرکے حل کرلیں گے،سیاسی مسائل صرف اس وقت حل ہوں گے جب سیاسی قیادت ٹیبل پر بیٹھے گی، جب تک ایک اور میثاق جمہوریت نہیں ہوگا تب تک موجودہ صورتحال تبدیل نہیں ہوسکتی۔ایک انٹرویو میں  رانا ثنا اللہ کا کہنا تھا  پی ٹی آئی اپنے معاملات میں بری طرح الجھتی جارہی ہے اور جب تک یہ جماعت الجھی رہے گی پاکستانی سیاست کو بھی الجھائے رکھے گی، یہ جس راستے پر جانا چاہتے ہیں اس سے جمہوریت مضبوط نہیں ہوگی، یہ جس راستے پر جانا چاہتے ہیں اس سے ان کو کوئی منزل نہیں ملے گی۔مشیر وزیراعظم کا کہنا تھا کہ کہا جا رہا ہے ہم نے اپنے مسائل اسٹیبلشمنٹ سے بات چیت کر کے حل کرنے ہیں، یہ مسائل ایسے حل نہیں ہوں گے ، جب سیاسی قیادت سر جوڑے گی حل ہوں گے لیکن بانی پی ٹی آئی کہتے ہیں میں نے اسٹیبلشمنٹ سے ہی بات کرنی ہے۔