بھارت کی ریاست بہار کے دربھنگہ ضلع کے سندر پور میں ایک افسوسناک واقعہ پیش آیا جہاں گیس سلنڈر کے دھماکے نے تباہی مچا دی۔
تفصیلات کے مطابق یہ واقعہ یونیورسٹی پولیس اسٹیشن کے دائرہ اختیار میں واقع سندر پور کے ٹینو پیڈ کے قریب بیچن داس کے گھر میں پیش آیا۔رات کے کھانے کی تیاری کے دوران اچانک گیس سلنڈر میں آگ لگ گئی اور اس کے نتیجے میں زوردار دھماکہ ہوا۔ دھماکے سے آگ نے تیزی سے پھیل کر پورے گھر کو اپنی لپیٹ میں لے لیا۔ اس حادثے میں 3 افراد جان کی بازی ہار گئے، جن میں بیچن داس، مسو کماری اور ان کا تین ماہ کا معصوم بچہ شامل ہے۔ زخمی ہونے والوں میں کئی افراد بھی شامل ہیں جو جھلس کر شدید زخمی ہوئے ہیں۔ ان زخمیوں کو فوری طور پر ایک پرائیویٹ اسپتال میں داخل کرایا گیا ہے جہاں ان کا علاج جاری ہے، اور حالت تشویشناک بتائی گئی ہے۔
واقعات کے مطابق، یہ حادثہ اس وقت پیش آیا جب والدین اور ان کا تین ماہ کا بچہ نئے کچن میں کھانا پکانے کی تیاریاں کر رہے تھے۔ مقامی لوگوں اور مقامی انتظامیہ کی مدد سے آگ پر قابو پایا گیا ہے۔ اسٹیشن انچارج سدھر کمار نے بتایا کہ اطلاع ملنے کے فوری بعد فائر ڈیپارٹمنٹ کو الرٹ کیا گیا اور بروقت کارروائی کے ذریعے آگ پر قابو پالیا گیا۔اس المناک حادثے کے بعد علاقے میں غم اور سوگ کا ماحول ہے، اور عوام اس افسوسناک واقعہ پر غمزدہ ہیں۔ حکام نے حادثے کی تحقیقات شروع کردی ہے تاکہ اس قسم کے واقعات سے بچاؤ کے لئے مناسب اقدامات کیے جا سکیں۔
