ہالی ووڈ کی مشہور ٹی وی سیریز ’بریکنگ بیڈ‘ میں والٹر وائٹ جونیئر کا کردار ادا کرکے شہرت حاصل کرنے والے امریکی اداکار آر جے مِٹے 34 سال کی عمر میں انتقال کر گئے۔
وہ اداکاری کے ساتھ معذور افراد کے حقوق اور معاشرتی شمولیت کے لیے آواز اٹھانے کے حوالے سے بھی جانے جاتے تھے۔غیر ملکی خبر رساں ادارے کے مطابق آر جے مِٹے کا انتقال پیر کے روز امریکی ریاست ٹیکساس کے شہر براؤنس وِل میں ہوا۔ ان کی نمائندگی کرنے والی ٹیلنٹ مینجمنٹ ایجنسی نے ان کی موت کی تصدیق کردی، تاہم انتقال کی وجہ اور دیگر حالات سے متعلق تفصیلات جاری نہیں کی گئیں۔آر جے مِٹے کو عالمی شہرت امریکی ٹی وی سیریز ’بریکنگ بیڈ‘ سے حاصل ہوئی، جس میں انہوں نے مرکزی کردار والٹر وائٹ کے بیٹے والٹر ’فلِن‘ وائٹ جونیئر کا کردار ادا کیا تھا۔ سیریز میں ان کا کردار ایک ایسے نوجوان کا تھا جو جسمانی معذوری کے ساتھ زندگی گزارتا ہے اور چلنے کے لیے بیساکھیوں کا استعمال کرتا ہے۔اس کردار کی خاص بات یہ تھی کہ آر جے مِٹے خود بھی دماغ اور جسم کی حرکت کو متاثر کرنے والی بیماری سیریبرل پالسی (Cerebral Palsy) کا شکار تھے۔ اسی ذاتی تجربے نے انہیں اپنے کردار کی مشکلات اور روزمرہ زندگی کے چیلنجز کو حقیقت کے قریب انداز میں پیش کرنے میں مدد دی۔
’بریکنگ بیڈ‘ کی کہانی ایک ہائی اسکول ٹیچر والٹر وائٹ کے گرد گھومتی ہے، جو خفیہ مجرمانہ سرگرمیوں میں ملوث ہو جاتا ہے۔ کہانی آگے بڑھنے کے ساتھ والٹر جونیئر کو اپنے خاندان میں آنے والی تبدیلیوں اور اپنے والد کی خفیہ زندگی کے اثرات کا سامنا کرنا پڑتا ہے۔سیریز میں ناشتے کی میز پر ان کے بار بار دکھائی دینے والے مناظر نے بھی مداحوں میں مقبولیت حاصل کی، جس کے باعث بعض ناظرین انہیں ’بریک فاسٹ کنگ‘ کے نام سے پکارتے تھے۔آر جے مِٹے کی اداکاری نے ٹیلی ویژن پر معذوری کی نمائندگی کو نمایاں کرنے میں اہم کردار ادا کیا۔ ان کی ایجنسی کے مطابق انہوں نے اپنے کردار کے ذریعے معذوری سے متعلق آگاہی، قبولیت اور معاشرے میں سب کو یکساں مواقع فراہم کرنے کے پیغام کو فروغ دیا۔
ان کی وفات سے مداحوں اور شوبز انڈسٹری میں ایک نمایاں شخصیت کا نقصان ہوا ہے، جبکہ ’بریکنگ بیڈ‘ میں ان کی اداکاری ان کے مداحوں کے لیے یادگار رہے گی۔
