پاکستانی یوٹیوبر ڈکی بھائی نے شادی اور طلاق کے بڑھتے ہوئے رجحان پر گفتگو کرتے ہوئے ایک نسبتاً سخت مگر سماجی طور پر اہم مؤقف پیش کیا ہے۔
انہوں نے اپنی اہلیہ عروب جتوئی کے ہمراہ عدالت کے باہر میڈیا سے بات کرتے ہوئے کہا کہ شادی جیسے مضبوط اور سنجیدہ رشتے میں صرف وہی لوگ آئیں جو ذہنی طور پر پختہ ہوں اور ذمہ داری اٹھانے کی صلاحیت رکھتے ہوں۔ ان کے مطابق اگر کوئی شخص شروع ہی سے رشتے کو نبھانے کے لیے سنجیدہ نہیں تو اسے شادی نہیں کرنی چاہیے، کیونکہ اس سے دوسرے شخص کی زندگی متاثر ہوتی ہے۔ڈکی بھائی نے یہ بھی کہا کہ بعض اوقات مرد اور خواتین دونوں ہی شادی کو سنجیدگی سے نہیں لیتے، جس کے نتیجے میں بعد میں طلاق جیسے مسائل سامنے آتے ہیں۔
ان کے مطابق ازدواجی زندگی میں برداشت، سمجھداری اور باہمی احترام بنیادی چیزیں ہیں، جبکہ خاندانی مداخلت اکثر مسائل کو حل کرنے کے بجائے مزید پیچیدہ بنا دیتی ہے۔سوشل میڈیا پر ان کے اس بیان پر ملا جلا ردعمل سامنے آیا ہے۔ کچھ صارفین نے ان کی بات کو بالغ سوچ اور مثبت خاندانی اقدار سے جوڑتے ہوئے سراہا ہے، جبکہ کچھ نے اسے ایک عمومی مشورہ قرار دیا ہے جس پر ہر صورتحال میں یکساں طور پر عمل نہیں کیا جا سکتا۔
