چین کے سب سے زیادہ آبادی والے شہر شنگھائی میں 12 فروری کو لیان روڈ کے ایک مصروف چوراہے پر سڑک اچانک بیٹھ گئی، جس سے ایک گہرا سنک ہول بن گیا۔ ویڈیوز سوشل میڈیا پر وائرل ہوئیں اور شہریوں میں تشویش پھیل گئی۔
ابتدائی معلومات کے مطابق زمین دھنسنے کی بنیادی وجہ 11 فروری کو رپورٹ شدہ پانی کا رساؤ تھا، جو جیا من میٹرو لائن کے قیکسن روڈ اسٹیشن پر زیر زمین ٹنلنگ کے دوران سامنے آیا تھا۔ واقعے کے وقت کسی شخص کے زخمی یا ہلاک ہونے کی اطلاع نہیں ملی۔مقامی حکام نے متاثرہ علاقے کو بند کر کے تحقیقات اور مرمت کا آغاز کر دیا، کنکریٹ ڈال کر زمین کو مستحکم کیا گیا اور قریبی دفاتر و رہائشی عمارتیں عارضی طور پر خالی کرائی گئیں۔ ماہرین کے مطابق شنگھائی کی نرم زمین اور زیر زمین تعمیرات کے سبب دھنسنے کے حادثات ماضی میں بھی پیش آ چکے ہیں، خاص طور پر ایسے علاقوں میں جہاں پانی کے بہاؤ یا انفراسٹرکچر میں تبدیلی ہو۔
