پنجاب میں حالیہ سیلاب نے زرعی معیشت اور انفراسٹرکچر کو شدید نقصان پہنچایا ہے اور انسانی جانوں کا ضیاع بھی جاری ہے۔
مختلف علاقوں میں سیلاب متاثرین کو محفوظ مقامات پر منتقل کرنے والی کشتیوں کے الٹنے کے نتیجے میں کم از کم 3 افراد جاں بحق اور 9 لاپتہ ہو گئے ہیں۔
المناک واقعات کی تفصیل:
ملتان، جلالپور پیر والا: خان بیلہ روڈ کے قریب ایک کشتی الٹی جس میں 25 افراد سوار تھے۔ حادثے میں 20 دن کی نومولود بچی جاں بحق ہوئی، جبکہ دیگر تمام افراد کو ریسکیو 1122 اور مقامی امدادی ٹیموں نے بچا لیا۔ ابتدائی تحقیقات سے پتہ چلا کہ کشتی میں گنجائش سے زیادہ افراد سوار تھے۔
موہانہ سندیلہ: ایک کشتی الٹنے سے چار سالہ بچہ جاں بحق ہوا، جبکہ 18 افراد کو بچایا گیا۔ 9 افراد تاحال لاپتہ ہیں، تلاش جاری ہے۔
خان بیلہ: ایک اور کشتی حادثے کا شکار ہوئی، جس میں 2 ماہ کا شیر خوار بچہ ڈوب کر جاں بحق ہوا۔
مظفرگڑھ، علی پور: لتی ماڑی میں کشتی کا حادثہ پیش آیا، لیکن خوش قسمتی سے تمام افراد محفوظ رہے۔ حادثہ ایک شخص کے کشتی میں لٹکنے کی کوشش کی وجہ سے ہوا۔
بہاولنگر، بستی کلر والی: دریائے ستلج میں 12 سالہ بچہ ڈوب کر جاں بحق ہوا۔ تیز بہاؤ اور حفاظتی سہولیات کی کمی کے باعث ریسکیو آپریشن میں مشکلات پیش آئیں۔
ریسکیو اور حفاظتی اقدامات:
ریسکیو حکام کے مطابق متاثرہ علاقوں میں امدادی کارروائیاں جاری ہیں، تاہم کشتیوں، تربیت یافتہ عملے اور لائف جیکٹس کی کمی امدادی سرگرمیوں میں رکاوٹ بن رہی ہے۔ ضلعی انتظامیہ نے تمام حادثات کی تحقیقات شروع کر دی ہیں اور آئندہ ایسے واقعات سے بچاؤ کے لیے مزید سخت حفاظتی اقدامات کے عندیہ دیا ہے۔
