14اپریل تک اگر گندم کے نرخ طے نہ کئے گئے تو خواتین اور بچوں سمیت ہزاروں کی تعداد میں سڑکوں پر ہوں گئے

  کسانوں کی ملک گیر احتجاج کی دھمکی

 آج اخراجات 3400 روپے اور گندم کا ریٹ 2200 مل رہا ہے،گندم کا کاشتکار شدید پریشان ہے اور اس کو لگ رہا ہے کہ بچوں کو علاج اور سکول کی سہولتیں نہیں ملیں گی، بجلی اور کھادوں کا نرخ قوت خرید سے باہر ہے:کسان اتحاد

ملتان(خصوصی رپورٹ )کسان اتحاد نے حکومت کو خبردار کیا  ہے کہ 14اپریل تک اگر گندم  کے  نرخ طے نہ کئے گئے تو خواتین اور بچوں سمیت ہزاروں کی تعداد میں احتجاج کیا جائیگا۔ اس بات کا اعلان چیئرمین کسان اتحاد خالد کھوکھر نے پریس کانفرنس سے خطاب کرتے ہوئے کیا۔انہوں نے کہا کہ ڈھائی کروڑ ایکڑ پر گندم کاشت ہے لیکن آج گندم کا کاشتکار شدید پریشان ہے اور اس کو لگ رہا ہے کہ بچوں کو علاج اور سکول کی سہولتیں نہیں ملیں گی۔خالد کھوکھر نے کہا کہ جو مراعات ایم این اے کی ہیں وہ کسان کو ملنی چاہئیں لیکن کاشتکار کی پیداواری لاگت نہیں مل رہی، ہماری بجلی اور کھادوں کا نرخ قوت خرید سے باہر ہوگیا ہے، کاشتکار اپنے زیور فروخت کر کے زرعی دوائیں خریدتا ہے،  آج اخراجات 3400 روپے اور گندم کا ریٹ 2200 مل رہا ہے۔ان کا کہنا تھا کہ حکومت نے فیصلہ کیا اور صوبہ بندی اور ضلع بندی ختم کر دی، حکومت فیصلہ کرے کہ ایک سال روٹی اور آٹے کا ریٹ طے نہیں کریں گے۔