یو اے ای کی مخصوص قومیتوں کو تاحیات گولڈن ویزا دینے کی بھارتی میڈیا کی خبروں کی تردید

ابوظہبی (آئی این پی )متحدہ عرب امارات نے مخصوص قومیتوں کو عمر بھر کے لیے گولڈن ویزا دینے کے حوالے سے زیر گردش افواہوں کی تردید کردی ۔یو اے ای کی سرکاری خبر رساں ایجنسی وام کے مطابق ان میڈیا رپورٹس کو مسترد کر دیا گیا ہے جن میں دعویٰ کیا گیا تھا کہ نئی نامزدگی پر مبنی گولڈن ویزا سکیم کا آغاز کیا گیا ہے۔یو اے ای حکومت کے سرکاری پورٹل کے مطابق اس ویزا کے لیے سرمایہ کار، کاروباری افراد، سائنسدان، نمایاں طلبا و فارغ التحصیل، انسانیت کے علمبردار اور فرنٹ لائن ہیروز اہل قرار دیے گئے ہیں۔