سائنسدانوں نے خبردار کیا ہے کہ گرین لینڈ کی برفانی چادریں غیر معمولی رفتار سے پگھل رہی ہیں، جس کے نتیجے میں دنیا بھر کے ساحلی شہروں کو شدید خطرات لاحق ہو سکتے ہیں۔
ایک نئی تحقیق کے مطابق گرین لینڈ کی برف کی تہہ کے بڑے حصے ماضی میں مکمل طور پر پگھل چکے ہیں اور یہ عمل دوبارہ ہو سکتا ہے کیونکہ کرہ ارض کے گرم ہونے کا سلسلہ جاری ہے۔تحقیق میں بتایا گیا کہ گرین لینڈ آئس شیٹ کے ایک اونچے مقام پر کھدائی کے دوران حاصل کیے گئے نمونوں سے معلوم ہوا کہ برف پچھلے 10 ہزار سالوں میں غائب ہو چکی ہے۔اوٹاوا یونیورسٹی کے محققین اور بین الاقوامی شراکت داروں نے انسانی سرگرمیوں کے علاوہ ایک اور پوشیدہ عنصر بھی دریافت کیا: برف کے نیچے موجود گہری اور ناہموار گرمی، جو برف کو تیزی سے نقصان پہنچا رہی ہے۔
سائنسدانوں نے سیٹلائٹ ڈیٹا، سیسمک ریڈنگ، کشش ثقل کی پیمائش اور 3D کمپیوٹر ماڈلز کا استعمال کرتے ہوئے دریافت کیا کہ برف کے نیچے کی بنیاد کچھ جگہوں پر انتہائی گرم ہے، جس کی وجہ سے پگھلنے کی رفتار بڑھ رہی ہے۔ماہرین کا کہنا ہے کہ یہ تیزی سے پگھلنا سمندر میں اضافی پانی پیدا کر رہا ہے، جو دنیا بھر میں سمندر کی سطح میں اضافہ کا سبب بن رہا ہے۔ مزید پیش گوئی کی گئی ہے کہ مستقبل میں یہ اضافہ توقع سے کہیں زیادہ تیزی سے ہو سکتا ہے۔
