پاکستان منرلز انویسٹمنٹ فورم 2025 کا انعقاد 8 تا 9 اپریل کو ہونے جا رہا ہے، جس میں وزیر اعظم شہباز شریف اور آرمی چیف جنرل سید عاصم منیر شریک ہوں گے۔
فورم کا مقصد معدنی شعبے میں سرمایہ کاری کے فروغ کو تیز کرنا ہے۔ وزیر اعظم اور آرمی چیف اس موقع پر اہم خطاب بھی کریں گے۔اس فورم میں مختلف غیر ملکی شخصیات، وفاقی وزراء، سیکریٹریز، اور اعلیٰ سطح کے ایگزیکٹوز شرکت کریں گے۔ اس کے علاوہ، ایک اعلیٰ سطحی امریکی وفد، جس کی قیادت ایرک مائر کریں گے، بھی فورم میں شرکت کے لیے اسلام آباد پہنچ چکا ہے۔پاکستان میں معدنیات کے شعبے میں سرمایہ کاری کے لیے اہم موقع فراہم کیا جا رہا ہے، اور عالمی سرمایہ کاروں کی دلچسپی میں اضافہ ہو رہا ہے۔ فورم میں ریکوڈک سمیت بڑے معدنی منصوبوں پر بات چیت کی جائے گی، جس میں سرمایہ کاری، سکیورٹی، اور حکومتی پالیسیوں پر سیشنز منعقد ہوں گے۔علاوہ ازیں، فورم میں معدنیات کے شعبے میں جدید ٹیکنالوجی کے استعمال پر بین الاقوامی ماہرین کے ساتھ تبادلہ خیال کیا جائے گا۔ فورم کے ذریعے عالمی سطح پر پاکستان کے معدنی وسائل کو بہتر طور پر استعمال کرنے کا موقع فراہم کیا جا رہا ہے، جو اقتصادی ترقی کے لیے ایک اہم قدم ثابت ہوگا۔
