جماعت اسلامی نے عید الفطر کے بعد حکومت مخالف تحریک شروع کرنے کا اعلان کر دیا ہے۔
اس تحریک کا مقصد مہنگی بجلی، پیٹرول کی قیمتوں میں اضافے اور بڑھتی ہوئی مہنگائی کے خلاف عوامی احتجاج کو منظم کرنا ہے۔ جماعت اسلامی کے امیر حافظ نعیم الرحمٰن نے تحریک کا باقاعدہ روڈ میپ جاری کر دیا ہے۔
تحریک کے مراحل
روڈ میپ کے مطابق یہ تحریک چار مراحل میں مکمل کی جائے گی:
پہلا مرحلہ: جماعت اسلامی عوامی حمایت حاصل کرنے کے لیے سٹریٹ پاور کا مظاہرہ کرے گی۔
دوسرا مرحلہ: ڈویژنل ہیڈ کوارٹرز میں احتجاجی مظاہرے کیے جائیں گے۔
تیسرا مرحلہ: صوبائی سطح پر گورنر ہاؤس اور وزیر اعلیٰ ہاؤسز کے سامنے دھرنے دیے جائیں گے۔
چوتھا اور آخری مرحلہ: اسلام آباد کی جانب مارچ کیا جائے گا، جہاں دھرنے یا جلسے کا حتمی فیصلہ مرکز مجلس شوریٰ کرے گی۔
عوامی رابطہ مہم
رمضان المبارک کے دوران جماعت اسلامی ڈویژنل اور ضلعی سطح پر افطاریوں کا اہتمام کرے گی، جس کے ذریعے عوام سے رابطے بڑھائے جائیں گے۔ متحرک جماعتی کارکنان کی فہرستیں بھی تیار کی جا رہی ہیں تاکہ احتجاجی تحریک کو منظم انداز میں آگے بڑھایا جا سکے۔
حکومت پر دباؤ بڑھانے کی حکمت عملی
حافظ نعیم الرحمٰن نے واضح کیا ہے کہ مطالبات کی منظوری تک احتجاج جاری رہے گا اور کسی بھی حکومتی دباؤ کو قبول نہیں کیا جائے گا۔ جماعت اسلامی کا مؤقف ہے کہ مہنگائی اور بدترین گورننس کے باعث عوام شدید مشکلات کا شکار ہیں اور حکومت کے خلاف ملک گیر احتجاج ناگزیر ہو چکا ہے۔
اسلام آباد دھرنے کا امکان
تحریک کے آخری مرحلے میں جماعت اسلامی اسلام آباد میں احتجاج کرے گی، تاہم یہ دھرنا ہوگا یا جلسہ، اس کا فیصلہ جماعت کی مرکزی مجلس شوریٰ کرے گی۔حکومت مخالف اس تحریک کے اعلان کے بعد سیاسی منظرنامہ مزید گرم ہونے کا امکان ہے، جبکہ حکومت کی جانب سے اس تحریک کے ردعمل میں کیا حکمت عملی اختیار کی جائے گی، یہ دیکھنا باقی ہے۔
