پاکستان پیپلز پارٹی کے چیئرمین بلاول بھٹو زرداری نے گلگت بلتستان کے دورے کے دوران معروف ننھے یوٹیوبر شیراز اور ان کی بہن مسکان سے ملاقات کی، جس کی ویڈیوز سوشل میڈیا پر تیزی سے وائرل ہو گئی ہیں۔
تفصیلات کے مطابق بلاول بھٹو زرداری اس وقت انتخابی مہم کے سلسلے میں گلگت بلتستان کے مختلف علاقوں کے دورے پر موجود ہیں، جہاں انہوں نے اپنے مصروف شیڈول کے باوجود شیراز اور مسکان سے ملاقات کے لیے وقت نکالا۔ملاقات کی ویڈیوز سامنے آنے کے بعد سوشل میڈیا پر صارفین کی جانب سے اس لمحے کو خاصی توجہ حاصل ہوئی اور مختلف پلیٹ فارمز پر کلپس بڑے پیمانے پر شیئر کیے جا رہے ہیں۔ملاقات کے دوران بلاول بھٹو زرداری نے شیراز سے گفتگو کرتے ہوئے بتایا کہ وہ کراچی سے تعلق رکھتے ہیں اور وہیں سے ان کی ویڈیوز کو فالو کرتے رہے ہیں۔ انہوں نے کہا کہ وہ ننھے یوٹیوبر کے مداح ہیں اور ان سے مل کر انہیں خوشی ہوئی۔انہوں نے شیراز کی جانب سے کیے جانے والے سماجی کاموں کی بھی تعریف کی، جن میں مبینہ طور پر پانی کی فراہمی اور مقامی سطح پر اسکول کی تعمیر جیسے اقدامات شامل ہیں۔
بلاول بھٹو نے کہا کہ شیراز کی سرگرمیاں نہ صرف ان کی محنت کو ظاہر کرتی ہیں بلکہ یہ بھی دکھاتی ہیں کہ وہ اپنے علاقے کے لوگوں کے لیے مثبت کردار ادا کر رہے ہیں۔چیئرمین پیپلز پارٹی نے گفتگو کے دوران اپنے نانا اور سابق وزیراعظم ذوالفقار علی بھٹو کا حوالہ دیتے ہوئے کہا کہ وہ گلگت بلتستان کے عوام کے لیے خصوصی محبت اور توجہ رکھتے تھے اور اس خطے کی ترقی کے لیے ان کی خدمات نمایاں رہی ہیں۔انہوں نے شیراز کو مشورہ دیا کہ وہ اسی طرح محنت اور مثبت سرگرمیوں کو جاری رکھیں اور مستقبل میں بھی اپنے پلیٹ فارم کو عوامی فلاح کے لیے استعمال کریں۔یہ ملاقات اس وقت مزید توجہ کا مرکز بن گئی جب اس کی ویڈیوز سوشل میڈیا پر وائرل ہوئیں اور صارفین نے اس کو ایک دلچسپ اور غیر رسمی سیاسی لمحہ قرار دیا۔
