متحدہ عرب امارات کے صدر شیخ محمد بن زاید آل نہیان کی خصوصی ہدایت پر نیشنلز ڈیبیٹ سیٹلمنٹ فنڈ نے 222 شہریوں کے مجموعی طور پر 139 ملین درہم سے زائد کے قرضے معاف کر دیے ہیں۔
یہ اقدام خاص طور پر ریٹائر افراد اور سماجی تحفظ کے مستحقین کے مالی بوجھ کو کم کرنے اور ان کے معیار زندگی کو بہتر بنانے کے لیے اٹھایا گیا ہے۔
تفصیلات کے مطابق:
132 ریٹائرڈ شہریوں کے 86 ملین درہم سے زائد قرضے معاف کیے گئے۔سماجی تحفظ کے زمرے میں شامل 90 شہریوں کو 53 ملین درہم سے زیادہ قرضوں سے استثنیٰ دیا گیا۔یہ اقدام امارات میں سماجی بہبود اور استحکام کو فروغ دینے کے لیے کیا گیا ہے تاکہ شہریوں کی زندگی آسان ہو اور خاندانی استحکام مضبوط ہو سکے۔دوسری جانب، عید الاضحیٰ کے موقع پر صدر شیخ محمد بن زاید نے اصلاحی اداروں کو 963 قیدیوں کی رہائی کا حکم دیا ہے، جن پر عائد تمام مالی جرمانے بھی ادا کیے جائیں گے۔ یہ معافی امارات کی مختلف مذہبی اور قومی تقریبات کے دوران قیدیوں کو معاشرے میں دوبارہ شمولیت کا موقع دینے اور ہمدردی و عفو و درگزر کو فروغ دینے کے تسلسل کا حصہ ہے۔
اسی طرح، دبئی کے حکمران شیخ محمد بن راشد المکتوم نے بھی مختلف قومیتوں سے تعلق رکھنے والے 985 قیدیوں کی رہائی کا حکم جاری کیا ہے تاکہ وہ عید کے موقع پر نئی زندگی کی شروعات کر سکیں۔یہ اقدامات متحدہ عرب امارات کی حکومت کی سماجی اصلاحات اور انسانی ہمدردی کی پالیسیوں کی عکاسی کرتے ہیں، جو ملک میں امن، خوشحالی اور سماجی ہم آہنگی کو فروغ دینے کے لیے کیے جا رہے ہیں۔
