ویب ڈیسک: امریکی صدر ڈونلڈ ٹرمپ کی جانب سے بھارت پر مزید ٹیرف لگانے کے اعلان نے بھارتی میڈیا اور مودی حکومت کو ہلا کر رکھ دیا۔
"گودی میڈیا" کہلانے والا بھارتی میڈیا اس اعلان کے بعد شدید بوکھلاہٹ کا شکار ہوگیا اور ٹرمپ پر سخت تنقید شروع کردی۔
بھارتی میڈیا کا ردعمل
بھارتی میڈیا نے امریکی صدر پر تنقید کرتے ہوئے کہا کہ ٹرمپ نے بھارت پر نمایاں طور پر زیادہ ٹیرف عائد کرنے کا عندیہ دیا ہے اور وہ "بے شرمی سے خود پسندی میں ڈوبا ہوا شخص ہے"۔میڈیا رپورٹس میں کہا گیا کہ "ٹرمپ کو نااہل قرار دینے کی بے شمار وجوہات ہیں اور اس کا نفسیاتی تجزیہ آج دنیا بھر میں ایک ابھرتا ہوا کاروبار بن چکا ہے"۔
مودی حکومت پر اثرات
ٹرمپ کے اعلان نے مودی سرکار کی معاشی پالیسیوں پر سوالیہ نشان لگا دیا۔ اضافی ٹیرف نے بھارت کے اس دعوے کا بھی پردہ چاک کر دیا کہ وہ دنیا کی تیسری بڑی معیشت ہے۔ ماہرین کے مطابق، امریکا کے اس اقدام نے مودی حکومت کی سفارتی ناکامی کو نمایاں کردیا اور بھارتی میڈیا کی جانب سے مسلسل معاشی کامیابیوں کے دعوے بے نقاب ہوگئے۔
"گودی میڈیا" کا یوٹرن
گودی میڈیا نے ٹرمپ کو "ذہنی مریض، خود پسند اور نااہل" قرار دینا شروع کردیا۔ رپورٹس کے مطابق، بھارتی میڈیا کا رویہ اس بات کو ظاہر کرتا ہے کہ ٹرمپ کے اس اعلان نے مودی حکومت اور اس کے حمایتی میڈیا کو عالمی سطح پر رسوا کردیا ہے۔
پس منظر
امریکی صدر ٹرمپ کی سخت معاشی پالیسیوں اور اضافی ٹیرف کے اعلان نے امریکا-بھارت تجارتی تعلقات میں واضح دراڑ پیدا کر دی ہے۔ ماہرین کا کہنا ہے کہ اگر یہ پالیسی جاری رہی تو بھارت کی معیشت پر اس کے مزید منفی اثرات مرتب ہوں گے۔
