ادائیگیوں میں تاخیر ،ایل ڈی اے کاترقیاتی عمل متاثر

منصوبوں کے مکمل فنڈز جاری نہ ہونے سے ادارے کو مالی دبا ئو کا سامنا 
 لاہور(خصوصی رپورٹ)ایل ڈی اے کے جاری اور مکمل ہونیوالے منصوبوں کی ادائیگیوں میں تاخیر نے ادارے کا ترقیاتی عمل متاثر کر دیا۔ذرائع کے مطابق پنجاب حکومت نے ماضی کے منصوبوں کے مکمل فنڈز جاری نہیں کیے جس سے ادارے کو مالی دبا ئو کا سامنا ہے۔ایل ڈی اے نے واجب الادا رقوم کیلئے حکومت کو متعدد مراسلے ارسال کیے اسکے باوجود فنڈز کا اجرا نہ ہو سکا۔بند روڈ ایکسیس کنٹرول کوریڈور پراجیکٹ اور راوی برج توسیعی منصوبہ پر تعمیراتی کام مکمل ہونے کے باوجود مکمل فنڈز جاری نہیں ہوئے۔ ادائیگیاں تاحال زیرِ التواہیں۔اسی طرح سٹرکچرل پلان روڈز، ٹولنٹن مارکیٹ اور زیر تعمیر سپورٹس کمپلیکسز کے فنڈز بھی تعطل کا شکار ہیں۔ایل ڈی اے نے ہرانے راوی برج کی بہتری کیلئے 22 کروڑ 53 لاکھ کی ڈیمانڈ کی تھی، یہ رقم بھی جاری نہ ہو سکی۔ادارے نے حال ہی میں لاہور میں چار نئی سٹرکچرل پلان روڈز کی منظوری دی تھی جس کیلئے 10 ارب درکار ہیں تاہم ان پلان روڈز کیلئے بھیجی گئی سمری بھی فائلوں میں دب کر رہ گئی ہے۔ذرائع کا کہنا ہے کہ شہر کے زیرِ تعمیر سپورٹس کمپلیکسز کے 5ارب کا اجرا بھی نہیں ہو سکا جس سے منصوبے تاخیر کا شکار ہیں۔فنڈز کی عدم دستیابی پر ترقیاتی منصوبے مالی بحران کی زد میں ہیں، خدشہ ظاہر کیا جا رہا ہے کہ بروقت ادائیگیاں نہ ہوئیں تو نئے منصوبوں کی رفتار بھی متاثر ہو سکتی ہے۔