انگور صرف لذیذ پھل نہیں بلکہ صحت کے لیے بھی بے حد مفید ہے۔ دنیا بھر میں یہ سبز، سرخ، نیلے، جامنی اور سیاہ رنگوں میں دستیاب ہوتا ہے اور خشک میوہ کشمش بھی انگور سے تیار کی جاتی ہے۔
انگور کے صحت مند فوائد
1. اینٹی آکسائیڈنٹس سے بھرپور
انگور میں کیروٹین، پولی فینولز اور دیگر اینٹی آکسائیڈنٹس شامل ہیں جو دل کی صحت مضبوط رکھتے اور بعض اقسام کے کینسر کے خطرے کو کم کرتے ہیں۔ یہ خون کی شریانوں میں مضر ذرات کے جمع ہونے سے بھی روکتا ہے، جس سے دوران خون بہتر اور بلڈ پریشر کم ہوتا ہے۔
2. جلدی مسائل کی روک تھام
انگور میں موجود جز resveratrol کیل مہاسوں کا باعث بننے والے بیکٹیریا کے خلاف مؤثر ہے اور جلد کی عمر بڑھنے سے متعلق علامات کو کم کرنے میں مددگار ثابت ہوتا ہے۔
3. پوٹاشیم کا بہترین ذریعہ
100 گرام انگور میں 191 ملی گرام پوٹاشیم ہوتا ہے جو ہائی بلڈ پریشر، کولیسٹرول اور دل کی صحت بہتر بنانے میں مدد دیتا ہے۔ یہ پیٹ میں گیس اور پھولنے کے مسئلے کو بھی کم کرتا ہے۔
4. آنکھوں کے لیے فائدہ مند
انگور کھانے سے آنکھوں کے خلیات کو نقصان سے بچانے میں مدد ملتی ہے اور بینائی بہتر رہتی ہے، کیونکہ یہ نقصان دہ مالیکیولز کے اثرات کو کم کرتا ہے۔
5. دماغی صحت کو مضبوط کرے
انگور کھانے کی عادت دماغی تنزلی کے خطرے کو کم کرتی ہے اور الزائمر سے جڑے اثرات سے تحفظ فراہم کرتی ہے۔
6. جوڑوں کے لیے بہترین
انگور میں موجود اینٹی آکسائیڈنٹس جوڑوں کی لچک اور حرکت کو بہتر بناتے ہیں اور گھٹنوں کی تکلیف میں ریلیف فراہم کرتے ہیں۔
7. ورم کش خصوصیات
انگور میں ایسے انزائمز موجود ہیں جو جسم میں ورم کو کم کرنے میں مدد دیتے ہیں، جس سے دل، شریانوں اور دیگر اعضاء کی صحت بہتر ہوتی ہے۔
