میرے اور ابھیشیک کے خیالات مختلف ‘منزل ہمیشہ ایک ہی رہتی ہے‘ امیتابھ

 باہمی تعلق میں محبت، احترام، تلاش، دریافت اور ایک دوسرے کو سمجھنا بنیادی اہمیت رکھتے ہیں
ممبئی (شوبز ڈیسک)بالی ووڈ کے لیجنڈری اداکار امیتابھ بچن نے اپنے بیٹے ابھیشیک بچن کے ساتھ منفرد تعلق پر اظہار خیال کرتے ہوئے کہا ہے کہ دونوں کے خیالات مختلف ہوسکتے ہیں، لیکن منزل ہمیشہ ایک ہی رہتی ہے۔83 سالہ اداکار نے اپنے حالیہ بلاگ میں نئی نسل کے خیالات اور نقطہ نظر کا احترام کرنے کی اہمیت پر زور دیا ہے۔امیتابھ بچن نے لکھا ہے کہ باپ اور بیٹا ایک ہی اسٹیج پر ساتھ بیٹھتے ہیں، ان کے خیالات میں اختلاف ہوسکتا ہے، لیکن ان کی منزل ایک ہی ہوتی ہے۔انہوں نے کہا ہے کہ نئی نسل کے خیالات کا ہمیشہ احترام کیا جانا چاہیے اور زندگی کے ہر راستے کا مقصد ایسی مشترکہ منزل تلاش کرنا ہونا چاہیے جو سب کے لیے بہتر ہو۔امیتابھ بچن کے مطابق باہمی تعلق میں محبت، احترام، تلاش، دریافت اور ایک دوسرے کو سمجھنا بنیادی اہمیت رکھتے ہیں، جبکہ خیرخواہوں کی محبت بھی اس رشتے کا حصہ ہے۔