لاہور آنے والا سعودی ایئرلائن کا طیارہ حادثے سے بچ گیا

 انجن میں اڑان بھرتے ہی آگ بھڑک اٹھی ،،جماعت اسلامی  رہنما فرید احمد پراچہ بھی  سوار تھے
 لاہور(آئی این پی ) جدہ سے لاہور آنے والا سعودی ایئرلائن کا طیارہ بڑے حادثے سے بال بال بچ گیا ، طیارے کے انجن میں اڑان بھرتے ہی آگ بھڑک اٹھی تھی۔تفصیل کے مطابق سعودی ایئر لائن کے طیارے کے انجن میں اچانک آگ لگ گئی ، سعودی ائیر لائن کا طیارہ جدہ سے لاہور آرہا تھا ، جس میں 400 مسافر سوار تھے۔ذرائع نے بتایا طیارہ 29 اکتوبر کی رات تقریبا ساڑھے تین بجے روانہ ہوا تھا، جس کے کچھ دیر بعد انجن میں آگ لگ گئی، امیر جماعت اسلامی پاکستان کے سیاسی مشیر فرید احمد پراچہ بھی جہاز میں سوار تھے۔فرید احمد پراچہ نے بتایا کہ پائلٹ نے غیر معمولی مہارت کا مظاہرہ کرتے ہوئے جہاز کو بحفاظت لینڈ کرایا۔