نئی سیٹلائٹ تصاویر میں جنوبی غزہ کے شہروں رفح اور خان یونس کے علاقوں میں شدید تباہی واضح طور پر دیکھی جا سکتی ہے، جہاں رہائشی علاقوں، زرعی زمینوں، تعلیمی اداروں اور قبرستانوں کو بڑے پیمانے پر نقصان پہنچا ہے۔
بین الاقوامی میڈیا کے مطابق، ان اپ ڈیٹ شدہ فضائی تصاویر سے پتہ چلتا ہے کہ کئی رہائشی بستیوں اور اہم عوامی مقامات اب اپنی سابقہ حالت میں نظر نہیں آ رہے۔ خان یونس کے شیخ محمد قبرستان بھی جنگی کارروائیوں سے شدید متاثر ہوا ہے، اور علاقے کی جغرافیائی صورتحال بدل چکی ہے۔رفح کے محلوں، سرحدی تنصیبات اور رہائشی منصوبوں کو بھی نقصان پہنچا ہے، جہاں کچھ علاقے صرف ملبے کے ڈھیر بن گئے ہیں۔ تعلیمی شعبہ بھی بری طرح متاثر ہوا ہے، اور متعدد اسکولوں اور جامعات کی عمارتیں تباہ ہو چکی ہیں، جس سے ہزاروں طلبہ کی تعلیمی سرگرمیاں معطل ہیں۔اقوام متحدہ اور انسانی حقوق کی تنظیمیں کہتی ہیں کہ زرعی زمینوں کا بڑا حصہ تباہ یا ناقابلِ استعمال ہو چکا ہے، جس سے خوراک کی قلت اور انسانی بحران میں اضافہ ہوا ہے۔
لاکھوں فلسطینی بے گھر ہو چکے ہیں اور عارضی کیمپوں میں رہنے پر مجبور ہیں، جبکہ ساحلی علاقوں میں خیمہ بستیوں پر دباؤ بڑھ رہا ہے۔اسرائیلی فوج کا مؤقف ہے کہ کارروائیاں مسلح گروہوں کے خلاف سیکیورٹی کے لیے ہیں، مگر فلسطینی حکام اور بین الاقوامی ادارے انسانی صورتحال پر تشویش کا اظہار کر رہے ہیں۔ تجزیہ کار کہتے ہیں کہ سیٹلائٹ تصاویر نے جنگ کے اثرات کو نئی صورت میں دنیا کے سامنے لایا ہے، اور خطے میں امن و استحکام کے لیے فوری جنگ بندی اور انسانی امداد ضروری ہے۔
