عالمی مارکیٹ میں سونے کی قیمت میں اہم اضافہ دیکھا گیا ہے، جس کے نتیجے میں فی اونس سونا دوبارہ 4 ہزار ڈالر سے تجاوز کر گیا ہے۔
اس اضافے کی بنیادی وجوہات میں امریکی ڈالر کی کمی اور فیڈرل ریزرو کی جانب سے ممکنہ شرح سود میں کمی کی توقعات شامل ہیں۔ منگل کی صبح 0141 جی ایم ٹی کے مطابق، اسپاٹ گولڈ 0.7 فیصد اضافے کے ساتھ 4,009.39 ڈالر فی اونس پر ٹریڈ کر رہا تھا، جو پیر کے روز 3 فیصد گراوٹ کے بعد اکتوبر 10 کے بعد کی کم ترین سطح پر تھا۔ امریکی گولڈ فیوچرز بھی 0.1 فیصد اضافے کے ساتھ 4,022.10 ڈالر فی اونس پر بند ہوئے۔ٹِم واٹرر، کے سی ایم ٹریڈ کے چیف مارکیٹ تجزیہ کار، کا کہنا ہے کہ حالیہ کمی کے بعد سرمایہ کاروں نے خریداری میں دلچسپی ظاہر کی ہے، کیونکہ ڈالر میں معمولی کمی اور عالمی غیر یقینی صورتحال نے سونے کو سہارا دیا ہے۔ امریکی ڈالر انڈیکس میں 0.1 فیصد کمی دیکھی گئی، جس سے دیگر کرنسیوں کے حامل سرمایہ کاروں کے لیے سونا سستا ہو گیا ہے۔اگرچہ چین اور امریکا کے درمیان تجارتی مذاکرات میں پیش رفت ہوئی ہے، مگر تجزیہ کاروں کا کہنا ہے کہ شرح سود میں ممکنہ کمی اور عالمی غیر یقینی حالات سونے کو مستحکم رکھنے میں مددگار رہیں گے۔
دونوں ممالک کے اقتصادی حکام نے ممکنہ تجارتی معاہدہ کا مسودہ تیار کیا ہے، جسے اس ہفتے صدر ٹرمپ اور چینی صدر شی جن پنگ کے جائزے کے لیے پیش کیا جائے گا۔اس کے علاوہ، ٹرمپ نے ایشیا کے دورے کے دوران ملائیشیا میں دیگر جنوب مشرقی ایشیائی ممالک کے ساتھ تجارتی اور معدنی وسائل کے معاہدوں کا اعلان کیا ہے۔ ماہرین کا کہنا ہے کہ تجارتی کشیدگی میں کمی سونے کی کشش کو کم کر سکتی ہے، مگر شرح سود میں کمی اور عالمی غیر یقینی صورتحال اسے سرمایہ کاروں کے لیے پرکشش بنائے رکھتی ہیں۔پاکستان میں بھی سونے کی قیمت میں اضافہ دیکھنے میں آیا ہے، جہاں فی تولہ قیمت 4 لاکھ 30 ہزار 362 روپے تک پہنچی ہے، جبکہ دس گرام سونے کی قیمت 3 لاکھ 68 ہزار 966 روپے رہی، جس میں 2829 روپے کی کمی ہوئی ہے۔
