معمول سے 42فیصد کم بارشیں، ڈیم اور پانی کے ذخائر ڈیڈ لیول پر

پانی کی قلت سے فصلیں متاثر ہوں گی، بیماریوں کا پھیلا ئواور جنگلی حیات کو بھی خطرہ لاحق ہے،چیف میٹرولوجسٹ 
اسلام آباد (آئی این پی)چیف میٹرولوجسٹ محمد افضال نے کہا ہے کہ سردیوں میں معمول سے 42فیصد کم بارشوں نے ملک میں خشک سالی کی صورتحال پیدا کردی، اپریل سے درجہ حرارت تیزی سے بڑھنے کا خدشہ ہے۔اسلام آباد میں پریس کانفرنس کرتے ہوئے چیف میٹرولوجسٹ محمد افضال نے کہا کہ سردیوں میں معمول سے 42فیصد کم بارشوں نے ملک میں خشک سالی کی صورتحال پیدا کردی، اپریل سے درجہ حرارت تیزی سے بڑھنے کا خدشہ ہے، ملک کے جنوبی حصے میں ہیٹ ویووز آسکتی ہیں جبکہ جون میں بحیرہ عرب میں طوفان کا بھی خدشہ ہے۔انہوں نے کہا کہ موجودہ سال موسمیاتی لحاظ سے بہت غیرمعمولی ہے، ہمارے ڈیم اور پانی کے ذخائر ڈیڈ لیول پر ہیں، ملک میں خشک سالی کا سامنا ہے، پانی کی قلت سے فصلیں متاثر ہوں گی۔چیف میٹرولوجسٹ کا کہنا ہے کہ ملک کے شمالی حصہ میں بارش معمول سے کم ہوں گی، سندھ، پنجاب، بلوچستان کے مختلف اضلاع میں معمولی سے شدید نوعیت کی خشک سالی ہے، بیماریوں کا پھیلا ئواور جنگلی حیات متاثر ہوگی۔انہوں نے عوام سے اپیل کی کہ پانی کا استعمال اعتدال سے کریں، موجودہ بارشوں کا سلسلہ شمالی علاقوں میں ہوگا، اس سلسلے سے پانی زیادہ ہونے کا امکان نہیں۔