پاکستان کے معروف گلوکار اور اداکار علی ظفر جلد ایک بڑے بجٹ کی نئی کرائم سیریز کے ذریعے اداکاری کی دنیا میں واپسی کرنے جا رہے ہیں۔
اطلاعات کے مطابق اس سیریز میں علی ظفر کے ساتھ حمائمہ ملک، فیروز خان اور سونیا حسین بھی اہم کردار ادا کریں گے۔اپنی گلوکاری، منفرد انداز اور اداکاری کے باعث شہرت حاصل کرنے والے علی ظفر نے بالی ووڈ میں بھی کام کیا، جبکہ پاکستانی سینما میں ان کی فلموں کو بھی پذیرائی ملی۔ اب وہ ایک نئے منصوبے کے ساتھ پاکستانی سیریز کی دنیا میں قدم رکھنے کے لیے تیار ہیں۔میڈیا رپورٹس کے مطابق اس کرائم سیریز کی ہدایت کاری انس علی کریں گے۔ اگرچہ سیریز کی کہانی، کرداروں کی تفصیلات اور ریلیز کی تاریخ کے حوالے سے مزید معلومات سامنے نہیں آئیں، تاہم معروف فنکاروں کی شمولیت کے باعث اس منصوبے کو توجہ حاصل ہو رہی ہے۔
سیریز میں حمائمہ ملک کی شمولیت بھی اہمیت رکھتی ہے، جو کچھ عرصے کے وقفے کے بعد اسکرین پر واپسی کر رہی ہیں۔ ان کے ساتھ فیروز خان اور سونیا حسین کی موجودگی اس منصوبے میں مختلف فنکارانہ انداز یکجا کرے گی۔علی ظفر کے مداح طویل عرصے سے انہیں پاکستانی ڈراموں اور سیریز میں اداکاری کرتے دیکھنے کے خواہش مند رہے ہیں۔ اس سے قبل وہ سجل علی اور بلال عباس خان کے ڈرامے ’لہو‘ کا حصہ بننے پر آمادہ ہوئے تھے، تاہم بعد میں وہ اس منصوبے سے الگ ہو گئے تھے۔
