لاہور: شہر بھر میں چینی کی قیمتوں میں مسلسل اضافہ دیکھنے میں آ رہا ہے، جہاں 50 کلوگرام چینی کا تھیلا 8600 روپے تک جا پہنچا ہے۔
ہول سیل سطح پر چینی کی فی کلو قیمت 172 روپے تک پہنچ چکی ہے، جبکہ ضلعی انتظامیہ کریانہ فروشوں پر 164 روپے فی کلو کے حساب سے فروخت کے لیے دباؤ ڈال رہی ہے۔
قیمتوں میں اضافہ جاری:
صارفین اور دکانداروں کا کہنا ہے کہ چینی کی قیمتوں میں اضافہ گزشتہ چند روز سے غیر اعلانیہ طور پر جاری ہے۔ہول سیلرز کا مؤقف ہے کہ انہیں خود مہنگے داموں چینی مل رہی ہے، اس لیے سستی فروخت ممکن نہیں۔
انتظامیہ کا ایکشن:
ڈی سی لاہور نے چینی کی قیمتوں میں اضافے کا نوٹس لیتے ہوئے کریانہ مرچنٹس، ہول سیلرز اور دیگر اسٹیک ہولڈرز کا اجلاس طلب کر لیا ہے۔اجلاس ڈی سی آفس لاہور میں ہوگا جہاں چینی کی قیمتوں میں اضافے کی وجوہات، طلب و رسد کی صورتحال اور ممکنہ اقدامات پر غور کیا جائے گا۔
صارفین کو مشکلات:
چینی کی قیمتوں میں مسلسل اضافے کے باعث عوام شدید پریشانی کا شکار ہیں۔ متوسط اور کم آمدنی والے طبقے کیلئے روزمرہ ضروریات کی اشیاء تک رسائی مزید مشکل ہو گئی ہے۔
اگلے اقدامات:
ذرائع کے مطابق ضلعی حکومت ممکنہ طور پر مارکیٹ سروے، ذخیرہ اندوزوں کیخلاف کارروائی اور قیمتوں کو کنٹرول میں رکھنے کے لیے نئی حکمت عملی پر غور کرے گی۔
