امریکہ کا جوہری صلاحیت والے میزائل منیٹ مین تھری کا تجربہ

میزائل تجربہ ایک معمول کی مشق تھی ‘موجودہ عالمی حالات کا ردعمل نہیں: امریکی فوج کا دعوی
واشنگٹن (آئی این پی )امریکی صدر ڈونلڈ ٹرمپ کی جانب سے پورے ملک کو جوہری حملوں سے محفوظ بنانے کے منصوبے گولڈن ڈوم کے اعلان کے دوران امریکی فضائیہ نے  ایک ایٹمی صلاحیت کے حامل بین البراعظمی بیلسٹک میزائل (ICBM) منٹ مین تھری کا تجربہ کیا۔غیرملکی خبررساں ادارے کے مطابق  یہ میزائل کیلیفورنیا میں واقع وینڈر برگ اسپیس فورس بیس سے لانچ کیا گیا، تاہم اس میں جوہری وارہیڈ نصب نہیں کیا گیا تھا۔امریکی فضائیہ کے مطابق یہ میزائل 15 ہزار میل فی گھنٹہ سے زیادہ رفتار کے ساتھ تقریبا 4 ہزار 200 میل کا سفر طے کرتے ہوئے مارشل آئی لینڈز میں امریکی فوج کے رونالڈ ریگن بیلسٹک ڈیفنس ٹیسٹ سائٹ، کوواجالین ایٹول پر جا پہنچا۔امریکی گلوبل اسٹرائیک کمانڈ کے سربراہ جنرل تھامس بوسیئر نے کہا کہ یہ تجربہ امریکہ کی جوہری صلاحیت اور بین البراعظمی میزائل نظام کی تیاری کا عملی ثبوت ہے۔