غزہ میں جاری تباہی کے بعد تعمیرِ نو کے لیے بھاری مالی وسائل درکار ہونے کا اندازہ لگایا گیا ہے، اور اقوام متحدہ و یورپی یونین نے مجموعی طور پر تقریباً 71.4 ارب ڈالر کی ضرورت ظاہر کی ہے۔
یہ بات اقوام متحدہ اور یورپی یونین کی مشترکہ رپورٹ “غزہ ریپڈ ڈیمیج اینڈ نیڈز اسسمنٹ” میں سامنے آئی ہے، جس میں گزشتہ 24 ماہ کے دوران ہونے والے نقصانات کا تفصیلی جائزہ پیش کیا گیا ہے۔رپورٹ کے مطابق جنگ اور فضائی حملوں کے نتیجے میں غزہ میں رہائشی عمارتیں، سڑکیں، اسپتال، تعلیمی ادارے اور دیگر بنیادی ڈھانچہ شدید متاثر ہوا ہے۔ اس تباہی کے باعث لاکھوں افراد بے گھر ہو چکے ہیں جبکہ صحت، تعلیم اور روزگار کے شعبے بھی بری طرح متاثر ہوئے ہیں۔
ماہرین کا کہنا ہے کہ غزہ کی مکمل بحالی ایک طویل اور پیچیدہ عمل ہوگا جس کے لیے عالمی سطح پر مالی، تکنیکی اور انسانی ہمدردی کی بنیاد پر تعاون ناگزیر ہے۔اقوام متحدہ اور یورپی یونین نے عالمی برادری سے اپیل کی ہے کہ وہ فوری طور پر تعمیرِ نو کے عمل میں کردار ادا کرے تاکہ متاثرہ آبادی کو بنیادی سہولیات فراہم کی جا سکیں اور خطے میں استحکام بحال ہو سکے۔
