سوڈان کے علاقے دارفور کے دارالحکومت الفاشر میں ایک مسجد پر ڈرون حملے کے نتیجے میں کم از کم 70 سے زائد شہری شہید اور درجنوں زخمی ہوگئے۔
حملے کی تفصیل:
مقامی حکام اور فوج کے مطابق حملہ پیراملٹری گروپ ریپڈ سپورٹ فورسز (RSF) نے کیا۔حملہ صفیہ مسجد میں اس وقت ہوا جب بڑی تعداد میں شہری نماز میں مصروف تھے۔سوڈانی فوج کی چھٹی انفنٹری ڈویژن نے کہا کہ یہ کارروائی جان بوجھ کر نمازیوں کو نشانہ بنانے کے لیے کی گئی۔
شہداء میں شامل افراد:
شہید ہونے والوں میں عام شہریوں کے ساتھ ساتھ بے گھر افراد بھی شامل ہیں، جو خانہ جنگی سے بچنے کے لیے مسجد میں پناہ لیے ہوئے تھے۔مقامی رضاکاروں کے مطابق متاثرین کی لاشیں مسجد کے ملبے سے نکالی گئیں۔
مقامی ردِعمل:
سوڈان ڈاکٹرز نیٹ ورک نے اس حملے کو غیر مسلح شہریوں کے خلاف سنگین جرم اور عالمی قوانین و مذہبی اقدار کی کھلی خلاف ورزی قرار دیا۔سوشل میڈیا پر مقامی مزاحمتی کمیٹیوں نے ویڈیوز شیئر کیں جن میں مسجد کا ملبہ اور شہداء کی لاشیں دکھائی گئی ہیں۔
پس منظر:
الفاشر شمالی دارفور کا دارالحکومت ہے اور خطے میں فوج کا آخری بڑا گڑھ تصور کیا جاتا ہے۔یہاں آر ایس ایف مئی 2024 سے فوجی تنصیبات کا محاصرہ کیے ہوئے ہے۔فوجی اہداف کو نشانہ بنانے کی کوششوں میں ہسپتال، اسکول اور بے گھر افراد کے مراکز بھی بری طرح متاثر ہوئے ہیں۔
