لاہور: وزیراعلیٰ پنجاب مریم نواز شریف کی زیر صدارت خصوصی اجلاس میں صوبے کے دیہات کو مثالی گاؤں بنانے کے منصوبے پر تفصیلی بریفنگ دی گئی، جس میں پنجاب خوشحال دیہات ایکٹ 2026 متعارف کرانے اور ابتدائی طور پر 120 دیہات میں پائلٹ پراجیکٹ شروع کرنے پر اتفاق کیا گیا۔
اجلاس کے دوران وزیراعلیٰ مریم نواز شریف نے منصوبے کی منظوری دیتے ہوئے ہدایت کی کہ ہر گاؤں میں عوامی نمائندوں کی مشاورت سے ویلج کمیٹی تشکیل دی جائے اور اس حوالے سے منصوبہ فوری طور پر پیش کیا جائے۔
ویلج کمیٹیوں کی تشکیل اور نگرانی کا نظام
اجلاس کو دی گئی بریفنگ کے مطابق، ہر ویلج کمیٹی میں چار عوامی نمائندے اور چار سرکاری نمائندے شامل ہوں گے۔ متعلقہ اسسٹنٹ کمشنر کمیٹی کی سربراہی کریں گے، جبکہ ڈپٹی کمشنر اپنے ضلع میں تمام ویلج کمیٹیوں اور منصوبے کی مجموعی نگرانی کے ذمہ دار ہوں گے۔منصوبے کے تحت دیہات میں ترقیاتی سرگرمیوں کو مؤثر بنانے کے لیے مقامی سطح پر مشاورت اور انتظامی نگرانی کا نظام قائم کیا جائے گا۔ اس کے علاوہ ارکان اسمبلی اور ٹکٹ ہولڈرز کو بھی متعلقہ دیہات میں ترقیاتی منصوبوں کی نگرانی کی ذمہ داری سونپی جائے گی۔
سیوریج، نکاسی آب اور پختہ گلیوں کی تعمیر
مثالی گاؤں منصوبے کے تحت دیہی علاقوں میں بنیادی سہولتوں کی بہتری پر توجہ دی جائے گی۔ اس سلسلے میں ہر گاؤں میں سیوریج اور ڈرینج کے نظام کو بہتر بنانے کے ساتھ گلیوں کو پختہ کرنے کے منصوبے بھی شامل ہیں۔حکومت کے اس اقدام کا مقصد دیہات میں بنیادی شہری سہولتوں کی فراہمی اور ترقیاتی منصوبوں کو مقامی ضروریات کے مطابق آگے بڑھانا ہے۔ منصوبے میں معیار اور شفافیت کو یقینی بنانے کے لیے متعلقہ انتظامی افسران اور عوامی نمائندوں کو ذمہ داریاں سونپی جائیں گی۔
ترقی کے ثمرات ہر گاؤں تک پہنچانے کا عزم
وزیراعلیٰ مریم نواز شریف نے اجلاس سے خطاب کرتے ہوئے کہا کہ پنجاب کے تمام دیہات کو مثالی گاؤں بنانے کا عزم غیر متزلزل ہے۔ ان کا کہنا تھا کہ ترقی کا دائرہ اب بڑے شہروں تک محدود نہیں رہے گا بلکہ اس کے ثمرات صوبے کے ہر گاؤں تک پہنچائے جائیں گے۔انہوں نے کہا کہ دیہات کی ترقی کے لیے مقامی لوگوں کی مشاورت کو اہمیت دی جائے گی اور ترقیاتی منصوبوں میں معیار اور شفافیت ہر صورت یقینی بنائی جائے گی۔وزیراعلیٰ پنجاب کا کہنا تھا کہ وہ دن دور نہیں جب صوبے کا ہر گاؤں ایک مثال بنے گا۔
