سینیٹر فیصل واوڈا نے 190 ملین پاؤنڈ کیس میں بانی پی ٹی آئی عمران خان کی سزا پر ایک اور دعویٰ کیا ہے۔
ان کا کہنا تھا کہ انہوں نے پہلے ہی پیش گوئی کی تھی کہ بانی پی ٹی آئی کو سزا ملے گی اور ہائیکورٹ میں بھی ان کی امیدوں کو مایوسی کا سامنا ہوگا۔فیصل واوڈا نے کہا کہ انہوں نے اس کیس کے حوالے سے پیش گوئی کی تھی کہ یہ ایک "اوپن اینڈ شٹ کیس" ہے، اور اب بانی پی ٹی آئی کی امیدیں ٹوٹ جائیں گی۔ انہوں نے مزید کہا کہ ملاقات کے دوران جو لوگ شادیانے بجا رہے تھے، ان کے لئے یہ ایک افسوسناک صورتحال ہو گی۔ فیصل واوڈا نے اس فیصلے کے بعد مذاکرات کے عمل میں رکاؤٹ آنے کا امکان بھی ظاہر کیا۔
یہ دعویٰ بانی پی ٹی آئی عمران خان کی سزا کے بعد سامنے آیا ہے جس میں انہیں 14 سال قید بامشقت اور جرمانے کی سزا دی گئی تھی، اور بشریٰ بی بی کو 7 سال قید بامشقت اور جرمانہ کی سزا سنائی گئی۔ اس فیصلے پر پی ٹی آئی کی جانب سے ہائیکورٹ میں اپیل دائر کرنے کا بھی فیصلہ کیا گیا ہے۔فیصل واوڈا نے اس فیصلے کو ایک بڑی کامیابی قرار دیتے ہوئے کہا کہ اب حکومت کے ساتھ مذاکرات کا پراسیس بھی رک جائے گا، کیونکہ بانی پی ٹی آئی کے لئے یہ فیصلہ ایک اور بڑی ناکامی ہے۔
