پاکستان میں انتخابات شفاف نہیں، تو ایوارڈز کی ووٹنگ پر کیسے اعتماد کیا جائے؟سیمی راحیل

پاکستانی شوبز انڈسٹری کی سینئر اداکارہ سیمی راحیل نے حال ہی میں ایک نجی ٹی وی پروگرام میں گفتگو کرتے ہوئے پاکستانی ایوارڈ شوز کے بارے میں سخت تنقید کی ہے۔

 انہوں نے اس بات پر زور دیا کہ یہ ایوارڈز جعلی اور غیر منصفانہ ہیں، کیونکہ ان کی ووٹنگ کا عمل شفافیت سے خالی ہے۔سیمی راحیل کا کہنا تھا کہ پاکستان جیسے ملک میں جہاں انتخابات کے اصل نتائج بھی مشکوک ہوتے ہیں، وہاں ایوارڈز کی ووٹنگ پر کیسے اعتماد کیا جا سکتا ہے؟ انہوں نے مزید کہا کہ یہاں تک کہ امریکہ جیسے ترقی یافتہ ملک میں بھی ووٹنگ کا عمل متاثر ہو چکا ہے، اس لیے ان ایوارڈز کو حقیقی نہیں سمجھا جا سکتا۔اداکارہ نے یہ بھی کہا کہ ہر فرد نے اپنی پسند کے لوگوں کو ووٹ دینے کے لیے اپنی جگہ بنا رکھی ہے اور اکثر اوقات صلاحیت کے بغیر بھی لوگوں کو انعامات دیے جاتے ہیں۔ ان کا کہنا تھا کہ ایسے ایوارڈز جعلی لگتے ہیں کیونکہ جن میں صلاحیت نہیں ہوتی، انہیں بھی عزت دی جاتی ہے۔سیمی راحیل نے یہ بھی نشاندہی کی کہ ہر چینل نے اپنے پسندیدہ افراد کو ایوارڈز دینے کا نظام بنایا ہوا ہے، جہاں اکثر تعصب اور ذاتی پسند نا پسند کو ترجیح دی جاتی ہے۔ ان کا کہنا تھا کہ ان ایوارڈز میں نہ کوئی میرٹ ہے اور نہ ہی انصاف کیا جاتا ہے۔