بھارت نے روس سے تیل کی خریداری تقریباً بند کر دی، امریکی دباؤ اور مغربی پابندیوں کے خوف کے باعث
امریکی جریدے بلوم برگ کی رپورٹ کے مطابق، بھارت نے دسمبر کے لیے روسی خام تیل کے نئے آرڈرز نہیں دیے، جو ماہانہ بنیادوں پر مکمل ہو جاتے تھے۔ رپورٹ کے مطابق، بھارت کی پانچ بڑی آئل ریفائنریوں نے اس ماہ کسی بھی نئی روسی تیل کی خریداری نہیں کی ہے۔ سرکاری ریفائنری انڈین آئل کارپوریشن (IOC) نے بھی اعلان کیا ہے کہ وہ صرف ایسے سپلائرز سے تیل خریدے گی جو پابندیوں سے آزاد ہوں۔
واضح رہے کہ امریکہ بھارت پر روسی تیل خریدنے پر 50 فیصد ٹیرف عائد کرتا ہے۔ امریکی صدر ڈونلڈ ٹرمپ نے حال ہی میں کہا تھا کہ بھارت روسی تیل خرید کر یوکرین کی جنگی مشین کو ایندھن فراہم کر رہا ہے۔امریکی دباؤ کے بعد، بھارت نے واشنگٹن کو یقین دہانی کرائی تھی کہ وہ مستقبل میں روس سے تیل کی خریداری کم کرے گا۔ یہ پیش رفت بھارت کی توانائی پالیسی اور عالمی تجارتی تعلقات میں اہم تبدیلی کی جانب اشارہ کرتی ہے۔
