ملک میں مہنگائی کا دباؤ بدستور برقرار ہے اور اشیائے خورونوش کی قیمتوں میں اضافے کا سلسلہ شہریوں کے لیے شدید مشکلات پیدا کر رہا ہے۔
رپورٹ کے مطابق درجہ اول گھی اور کوکنگ آئل کی قیمتوں میں مزید 3 روپے فی کلو/لیٹر اضافہ ہوا ہے، جس کے بعد ان کی قیمت 598 روپے فی کلو/لیٹر تک پہنچ گئی ہے۔ اسی طرح سن فلاور کوکنگ آئل 618 روپے فی لیٹر کی بلند ترین سطح پر فروخت ہو رہا ہے۔آٹے کی قیمتوں میں بھی مسلسل اضافہ جاری ہے، اور گزشتہ ہفتے کے دوران 10 سے 20 کلو کے تھیلے کی قیمت میں 120 سے 200 روپے تک اضافہ ریکارڈ کیا گیا ہے۔ اس کے ساتھ ساتھ معیاری چاول بھی مہنگے ہو کر عام صارف کی پہنچ سے دور ہوتے جا رہے ہیں۔مارکیٹ ذرائع کے مطابق اس اضافے کی بڑی وجوہات میں درآمدی لاگت، ٹرانسپورٹ اخراجات اور مہنگے ایندھن شامل ہیں، جنہوں نے مجموعی لاگت کو بڑھا دیا ہے۔
شہریوں کا کہنا ہے کہ روزمرہ استعمال کی بنیادی اشیا کی بڑھتی قیمتوں نے گھریلو بجٹ کو بری طرح متاثر کیا ہے، خاص طور پر کم اور متوسط آمدنی والے طبقے کے لیے صورتحال مزید مشکل ہو گئی ہے۔ عوام نے حکومت سے مطالبہ کیا ہے کہ مہنگائی پر قابو پانے اور بنیادی اشیائے ضروریہ کی قیمتوں میں استحکام لانے کے لیے فوری اور مؤثر اقدامات کیے جائیں۔
