دبئی کے سوشل میڈیا انفلوئنسر خالد العامری اور تامل اداکارہ سنینا کی منگنی کی خبریں حقیقت میں بدل گئی ہیں۔
خالد العامری نے اپنی انسٹاگرام پروفائل پر اپنی سالگرہ کی تصاویر شیئر کیں، جن میں وہ ایک خاتون کا ہاتھ تھامے ہوئے نظر آئے۔ تصاویر میں خاتون کا چہرہ واضح نہیں تھا، مگر لباس اور انداز سے ظاہر ہوتا ہے کہ یہ تامل اداکارہ سنینا ہیں۔ علاوہ ازیں، سنینا نے بھی اپنی انسٹاگرام پوسٹ میں اسی نوعیت کی تصویر شیئر کی اور انہیں ٹیگ کیا، جس سے منگنی کی افواہیں مزید مضبوط ہو گئیں۔خالد العامری اسٹینفورڈ یونیورسٹی سے گریجویٹ ہیں اور اپنی سابقہ اہلیہ سلامہ کے ساتھ بنائی گئی مزاحیہ ویڈیوز کی وجہ سے شہرت رکھتے ہیں۔ وہ اور سلامہ مشرق وسطیٰ کے مقبول ترین انفلوئنسر جوڑوں میں شامل تھے، تاہم 2024 کے آغاز میں ان کی شادی طلاق پر ختم ہوگئی، اور دونوں کے دو بیٹے ہیں۔
جون 2024 میں خالد العامری نے منگنی کی انگوٹھی پہن کر تصاویر شیئر کیں جن کے کیپشن میں انہوں نے لکھا، "الحمدللّٰہ"، اور اسی ماہ سنینا نے بھی اسی نوعیت کی تصاویر شیئر کیں۔ اس کے بعد سوشل میڈیا پر دونوں کی منگنی کی خبریں گردش کرنے لگیں، اور اب یہ تصدیق ہو گئی کہ دونوں نے واقعی منگنی کر لی ہے۔یہ خبر سوشل میڈیا پر صارفین کی دلچسپی کا مرکز بن گئی ہے، اور دونوں کی محبت اور ان کی زندگی کے اس نئے باب پر مداحوں کی طرف سے بھرپور ردعمل سامنے آیا ہے۔
