انسداد دہشت گردی عدالت اسلام آباد میں عدت میں نکاح کے دوران خاور مانیکا پر تشدد سے متعلق کیس کی سماعت ہوئی۔
جج طاہر عباس سپرا کی زیر صدارت ہونے والی اس سماعت میں، نعیم حیدر پنجھوتھا اور عثمان ریاض کی جانب سے دہشت گردی کی دفعات کے حوالے سے دائر درخواست پر دلائل پیش نہ کیے جا سکے۔ عدالت نے ملزم انصر کیانی کی عدم پیشی پر برہمی کا اظہار کیا اور کہا کہ اگر آج وہ پیش نہیں ہوتا تو وارنٹ جاری کیے جائیں گے اور مچلکے بھی ضبط کیے جائیں گے۔ جج نے مزید کہا کہ عام شہری اور وکیل کے لیے الگ قانون نہیں ہونا چاہیے، اور اگر اگلی سماعت پر دلائل پیش نہ کیے گئے تو درخواست کا ریکارڈ دیکھ کر فیصلہ کیا جائے گا۔ اس سلسلے میں عدالت نے کیس کی مزید سماعت 12 مئی تک ملتوی کر دی۔
