تھائی لینڈمیں پاکستانیوں کو بے یارومددگار نہیں چھوڑا جائے گا: ڈپٹی چیئرمین سینیٹ

 وزیراعظم شہباز شریف کی پالیسی ہے کوئی پاکستانی مشکل میں پھنس گیا ہے تو اسے عزت و احترام کیساتھ واپس لایا جائیگا
سید ال خان کا بینکاک میں پاکستانی سفارت خانے کا دورہ پاکستانی کے اغواء وجبری مشقت معاملے پرتشویش کااظہار
اسلام آباد/بنکاک (آن لائن) ڈپٹی چیئرمین سینیٹ نے تھائی لینڈ کے دارالحکومت بینکاک میں پاکستانی سفارت خانے کا دورہ کیا ۔اس موقع پر ہائی کمشنررخسانہ افضل کی قیادت میں سفارتی افسران نے پاکستان اور تھائی لینڈ کے تعلقات کے حوالے سے تفصیلی بریفنگ دی گئی۔ پاکستانی ہائی کمشنر نے بتایا کہ اس وقت تھائی لینڈ میں تقریباً پانچ ہزار پاکستانی مقیم ہیں جبکہ ماضی میں یہاں رہائش پذیر پاکستانیوں کی تعداد ایک سے ڈیڑھ لاکھ تک تھی۔ انہوں نے اس بات پر زور دیا کہ پاکستان اور تھائی لینڈ کے درمیان ہمیشہ سے بہترین تعلقات قائم رہے ہیں اور وقت کے ساتھ ان میں مزید بہتری آ رہی ہے۔دورے کے دوران پاکستانی ہائی کمشنر نے ایک اہم انسانی مسئلہ بھی ڈپٹی چیئرمین سینیٹ کے سامنے رکھا۔ انہوں نے آگاہ کیا کہ تھائی لینڈ اور برما کی سرحد پر پانچ سو سے زائد پاکستانی پھنسے ہوئے ہیں، جن میں خواتین بھی شامل ہیں۔ ان پاکستانیوں کو نوکریوں کا جھانسا دے کر وہاں بلایا گیا، لیکن بعد میں انہیں اغوا کر لیا گیا اور جبری مشقت پر مجبور کیا جا رہا ہے۔ڈپٹی چیئرمین سینیٹ سیدال خان ناصر نے اس سنگین معاملے پر تشویش کا اظہار کرتے ہوئے کہا کہ یہ پاکستانی ہمارے بھائی ہیں اور انہیں کسی بھی صورت میں بے یار و مددگار نہیں چھوڑا جائے گا۔ انہوں نے واضح کیا کہ وزیراعظم پاکستان شہباز شریف کی پالیسی ہے کہ کوئی بھی پاکستانی غیر قانونی طور پر بیرون ملک نہ جائے، اور اگر کوئی مشکلات میں پھنس بھی گیا ہے تو اسے عزت و احترام کے ساتھ واپس لایا جائے گا۔انہوں نے یقین دہانی کرائی کہ وہ اس معاملے کو وزیراعظم، وزیر خارجہ اور دیگر حکومتی سطح پر فوری طور پر اٹھائیں گے تاکہ تمام پاکستانیوں کی بحفاظت واپسی کو یقینی بنایا جا سکے۔سفارت خانے کے دورے کے موقع پر ڈپٹی چیئرمین سینیٹ سیدال خان ناصر نے مہمانوں کی کتاب میں اپنے تاثرات بھی قلمبند کیے۔