آزاد کشمیر کی خوبصورت وادی نیلم ایک دلخراش حادثے کی گواہ بنی، جہاں چلہانہ کے مقام پر ایک کار گہری کھائی میں گر کر دریائے نیلم میں جاگری، جس کے نتیجے میں 6 افراد جاں بحق ہو گئے، جن میں 5 خواتین بھی شامل ہیں۔
حادثے کے بعد علاقے میں غم کی فضا چھا گئی۔ڈیزاسٹر مینجمنٹ اتھارٹی (DDMA) نیلم کے مطابق کار میں مجموعی طور پر 7 افراد سوار تھے، جن میں ایک بچہ بھی شامل تھا۔ گاڑی تیز رفتاری یا سڑک کی خستہ حالی کے باعث قابو سے باہر ہوکر دریا میں جا گری۔ریسکیو حکام کے مطابق حادثے میں جاں بحق ہونے والے 6 افراد کی لاشیں نکال لی گئی ہیں، جب کہ ایک بچہ تاحال لاپتہ ہے۔ ریسکیو 1122، پولیس، اور مقامی افراد کی مدد سے تلاش کا عمل جاری ہے۔ڈی ڈی ایم اے نیلم نے تصدیق کی ہے کہ تمام جاں بحق افراد کا تعلق مظفرآباد، آزاد کشمیر سے تھا، اور وہ سیروتفریح کی غرض سے وادی نیلم آئے تھے۔ حکام کا کہنا ہے کہ لاپتہ بچے کی تلاش تک سرچ آپریشن جاری رہے گا۔
حادثے کے بعد ضلعی انتظامیہ نے اہل خانہ سے رابطہ کر کے مکمل تعاون کی یقین دہانی کروائی ہے، جبکہ متاثرہ خاندانوں کے لیے امدادی اقدامات پر بھی غور کیا جا رہا ہے۔یہ واقعہ ایک بار پھر وادی کے دشوار گزار راستوں اور سڑکوں کی حفاظتی صورتحال پر سوالیہ نشان بن گیا ہے۔ شہریوں اور سیاحوں سے اپیل کی جا رہی ہے کہ خطرناک اور پہاڑی علاقوں میں گاڑی چلانے میں احتیاط برتیں تاکہ قیمتی جانوں کے ضیاع سے بچا جا سکے۔
