پاکستان سپر لیگ (پی ایس ایل) کے ایک میچ میں لاہور قلندرز کے کھلاڑی فخر زمان پر کوڈ آف کنڈکٹ کی خلاف ورزی کے الزام کے تحت کارروائی متوقع ہے۔
تفصیلات کے مطابق یہ واقعہ کراچی کنگز کے خلاف میچ کے دوران پیش آیا، جہاں فخر زمان پر گیند کے ساتھ چھیڑ چھاڑ کرنے کا الزام ہے۔ اس معاملے کو پی ایس ایل قوانین کے تحت لیول تھری چارج قرار دیا گیا ہے، جو سنگین نوعیت کی خلاف ورزی سمجھا جاتا ہے۔ابتدائی سماعت میں فخر زمان نے یہ الزام مسترد کر دیا تھا، لیکن میچ ریفری روشن ماہنامہ آج دوبارہ سماعت کے بعد فیصلہ سنائیں گے۔ ذرائع کے مطابق فخر زمان کو تین یا اس سے زیادہ میچز کی پابندی لگنے کا امکان ہے، جو پی ایس ایل میں کھلاڑی کے لیے سخت ترین سزاؤں میں شمار ہوتی ہے۔
واقعے کے وقت، 20ویں اوور کے آغاز سے قبل امپائر نے مشکوک سرگرمی کی بنیاد پر گیند کو تبدیل کر کے کراچی کنگز کو 5 پینالٹی رنز دیے تھے، جس نے میچ پر بھی اثر ڈالا۔یہ فیصلہ نہ صرف فخر زمان کی ساکھ بلکہ ٹیم کی مجموعی حکمت عملی پر بھی اثر ڈال سکتا ہے، اور پی ایس ایل کی ریگولیٹری کمیٹی اس طرح کے معاملات میں سخت رویہ اختیار کرتی ہے تاکہ کھیل کی شفافیت اور قوانین کی پاسداری یقینی بنائی جا سکے۔
