سابق انگلش آل راؤنڈر 91 برس کی عمر میں چل بسے

لاہور(سپورٹس ڈیسک )انگلینڈ اور یارکشائر کے سابق آل راؤنڈر کین ٹیلر 91 برس کی عمر میں انتقال کر گئے۔ہڈرزفیلڈ میں پیدا ہونے والے کین ٹیلر نے صرف 17 برس کی عمر میں یارکشائر کی جانب سے فرسٹ کلاس کرکٹ کا آغاز کیا۔ انہوں نے اپنے کیریئر میں 303 فرسٹ کلاس میچز کھیلے اور یارکشائر کے لیے کئی برس تک اہم کردار ادا کیا۔ٹیلر نے 1959 سے 1968 کے درمیان یارکشائر کو سات کاؤنٹی چیمپئن شپ ٹائٹلز جتوانے میں حصہ لیا۔ یارکشائر نے انہیں اپنی نسل کے انتہائی ہمہ گیر اور صلاحیتوں سے مالا مال کھلاڑیوں میں شمار کیا۔بطور بلے باز انہوں نے فرسٹ کلاس کرکٹ میں 12 ہزار 864 رنز بنائے، جن میں 16 سنچریاں شامل تھیں۔ ان کی بہترین انفرادی اننگز 1961 میں وارکشائر کے خلاف ایجبسٹن میں ناقابلِ شکست 203 رنز تھی۔