ویب ڈیسک: پاکستان اسٹاک ایکسچینج میں تیزی کا رجحان مسلسل جاری ہے، جس کے تحت کاروباری ہفتے کے چوتھے روز بھی مارکیٹ کا آغاز زبردست مثبت انداز میں ہوا۔
جمعرات کو کاروبار کا آغاز ہوتے ہی بینچ مارک کے ایس ای-100 انڈیکس میں 583 پوائنٹس کا نمایاں اضافہ ریکارڈ کیا گیا، جس کے بعد انڈیکس 139,837 پوائنٹس کی نئی سطح پر پہنچ گیا۔گزشتہ روز بھی مارکیٹ کا آغاز مثبت رجحان سے ہوا تھا اور ابتدائی سیشن میں انڈیکس نے 139,000 پوائنٹس کی حد عبور کر لی تھی، تاہم دن کے اختتام پر کچھ منافع خوری کے باعث مارکیٹ منفی زون میں چلی گئی تھی۔
ڈالر کی قیمت میں کمی
دوسری جانب انٹر بینک مارکیٹ میں بھی کرنسی کے محاذ پر مثبت خبر سامنے آئی، جہاں امریکی ڈالر 51 پیسے سستا ہو کر 284.25 روپے پر بند ہوا۔ گزشتہ روز ڈالر کی قیمت 284.76 روپے تھی۔
سرمایہ کاروں کا اعتماد بحال
مالی ماہرین کے مطابق اسٹاک مارکیٹ میں جاری تیزی کی وجہ حکومت کی معاشی پالیسیوں میں بہتری، آئی ایم ایف کے ساتھ معاملات میں پیش رفت اور سیاسی ماحول میں کچھ حد تک استحکام ہے۔ مارکیٹ میں سرمایہ کاروں کا اعتماد بحال ہوا ہے، جس کا فائدہ انڈیکس کی مسلسل بلندی کی صورت میں سامنے آ رہا ہے۔
سرمایہ کاروں کو اربوں روپے کا فائدہ
اسٹاک مارکیٹ میں جاری اس مثبت تسلسل کے باعث سرمایہ کاروں کو اربوں روپے کا مالی فائدہ ہو چکا ہے۔ ماہرین کا کہنا ہے کہ اگر یہی رجحان برقرار رہا تو آئندہ ہفتوں میں انڈیکس 140,000 پوائنٹس سے بھی تجاوز کر سکتا ہے۔
ماہرین کی رائے
معاشی تجزیہ کاروں کے مطابق موجودہ رجحان برقرار رہنے کی صورت میں پاکستان اسٹاک مارکیٹ خطے کی مضبوط ترین مارکیٹوں میں سے ایک بن سکتی ہے، تاہم انہوں نے خبردار بھی کیا کہ سرمایہ کاروں کو محتاط رہتے ہوئے قلیل مدتی منافع خوری کے رجحان کو بھی مدنظر رکھنا چاہیے۔
