پنجاب میں اصلاحات‘ پولیس کو گرفتاری سے پہلے اجازت نامہ لینا ہوگا

اجازت لینے کیلئے 3فارم متعارف‘پولیس ٹیم مقدمہ نمبر، نامزد ملزم کی تفصیل، زیر استعمال گاڑی کے کوائف فارم پر لکھ کر دستخط کروائے گی
 گرفتاری فارم میں ملزم کی بیماری، جسم پر تشدد کے نشانات اور ادویات کی فراہمی سے متعلق تفصیل فراہم کی جائیگی‘سوالات کی تفصیل بھی درج ہوگی
لاہور(کرائم رپورٹر )وزیر اعلی مریم نواز کی پنجاب پولیس میں اصلاحات کے تحت پولیس کو چھاپہ مارنے سے قبل تحریری اجازت لینے کے لیے تین اہم فارم متعارف کروا دئیے گئے۔پولیس کو ریڈ سے قبل اجازت نامہ، گرفتاری کا فارم اور ہدایات برائے تفتیش مکمل کرنا لازم ہوگا۔لاہور سمیت پنجاب کے تمام تھانوں میں سسٹم بیسڈ فارمز نافذ کر دئیے گئے۔ ریڈ پر جانے والی پولیس ٹیم مقدمہ نمبر، نامزد ملزم کی تفصیل، زیر استعمال گاڑی کے کوائف فارم پر لکھ کر دستخط کروائے گی۔حکام کے مطابق گرفتاری فارم میں ملزم کی بیماری، جسم پر تشدد کے نشانات اور ادویات کی فراہمی سے متعلق تفصیل فراہم کی جائیں گی۔ جائے وقوعہ، تفتیشی آفیسر، شواہد اور ملزم سے سوالات کی تفصیل تیسرے فارم میں فراہم کی جائیں گی۔حکام کے مطابق سسٹم بیسڈ فارمز کا اطلاق پولیس حراست میں تشدد اور ملزمان کی ہلاکت کے سدباب کے لیے کیا گیا۔ پولیس چھاپوں کے دوران ایس او پیز کی خلاف ورزیوں میں کمی آئے گی۔