ترکیہ کے صوبے بالکسر میں ایک آتش گیر مواد کی فیکٹری میں دھماکے کے نتیجے میں 12 افراد ہلاک اور 3 زخمی ہوگئے ہیں۔
یہ واقعہ بالکسر شہر کے ایک صنعتی علاقے میں صبح کے وقت پیش آیا، جہاں ایک بارودی مواد کے پلانٹ کے ایک حصے میں دھماکہ ہوا۔ دھماکے کی شدت سے پلانٹ کی عمارت کا کچھ حصہ گر گیا، جس کے نتیجے میں متعدد افراد موقع پر ہی ہلاک ہوگئے، اور دیگر زخمی ہو گئے۔امریکی میڈیا کے مطابق، بالکسر کے گورنر نے اس دھماکے کی تصدیق کی اور بتایا کہ واقعے کے وقت فیکٹری میں کام کرنے والے 12 افراد اپنی جان سے ہاتھ دھو بیٹھے، جبکہ 3 دیگر افراد زخمی ہو گئے ہیں، جنہیں فوری طور پر قریبی اسپتال منتقل کیا گیا۔ حکام نے دھماکے کی وجوہات جاننے کے لیے تحقیقات کا آغاز کر دیا ہے، اور اس بات کی بھی تفتیش کی جا رہی ہے کہ آیا دھماکا کسی تکنیکی خرابی، یا کسی اور عوامل کے باعث ہوا۔
مقامی حکام اور فائر بریگیڈ کی ٹیمیں موقع پر پہنچ چکی ہیں اور امدادی کارروائیاں جاری ہیں۔ زخمیوں کو علاج فراہم کرنے کے لیے اسپتالوں میں منتقل کیا گیا ہے، اور حکام نے اس واقعے کی مکمل تحقیقات کرنے کی یقین دہانی کرائی ہے۔یہ حادثہ ترکیہ میں صنعتی نوعیت کے حوادث میں اضافے کی ایک اور مثال ہے، جہاں آتش گیر مواد کے پلانٹس اور فیکٹریوں میں حفاظتی تدابیر کے فقدان کی وجہ سے اس طرح کے واقعات رونما ہو رہے ہیں۔
