پاکستان سپر لیگ (پی ایس ایل) کے منتظمین لیگ کو سال بھر متحرک رکھنے اور شائقین کی دلچسپی برقرار رکھنے کے لیے چھ کھلاڑیوں پر مشتمل کرکٹ ٹورنامنٹ متعارف کرانے پر غور کر رہے ہیں۔
مجوزہ ایونٹ کو ’ایچ بی ایل پی ایس ایل سکسز‘ کا نام دیا جا سکتا ہے، جس کا انعقاد لیگ کے آف سیزن میں کرنے کی تجویز ہے۔تفصیلات کے مطابق پی ایس ایل انتظامیہ ایک مختصر دورانیے کے نئے کرکٹ فارمیٹ کے ذریعے لیگ کی مقبولیت میں مزید اضافہ کرنا چاہتی ہے۔ اس منصوبے کے تحت چھ کھلاڑیوں پر مشتمل ٹیمیں میدان میں اتارنے کی تجویز زیرِ غور ہے، تاہم ٹورنامنٹ کے انعقاد اور دیگر تفصیلات کے حوالے سے ابھی کوئی حتمی فیصلہ نہیں کیا گیا۔پی ایس ایل کے چیف ایگزیکٹو سلمان نصیر کے مطابق مجوزہ ٹورنامنٹ شائقین کے لیے تفریح کا ایک نیا موقع فراہم کرسکتا ہے۔ اس کے علاوہ لیگ کو ان چھوٹے شہروں تک پہنچانے میں بھی مدد مل سکتی ہے جہاں اب تک پی ایس ایل کے میچز منعقد نہیں ہوئے۔منصوبے کا ایک اہم مقصد پاکستان کرکٹ بورڈ اور پی ایس ایل فرنچائزز کے لیے آمدنی کے نئے ذرائع پیدا کرنا بھی ہے۔ نئے فارمیٹ سے میڈیا پارٹنرز کو بھی کاروباری مواقع ملنے کی توقع ہے، جبکہ لیگ کی سرگرمیوں کو مرکزی سیزن سے آگے بڑھانے میں مدد مل سکتی ہے۔
تاہم، مجوزہ ٹورنامنٹ کے انعقاد میں کئی چیلنجز بھی درپیش ہیں۔ ان میں غیر ملکی کھلاڑیوں کی دستیابی، ٹیموں کے لیے موزوں شیڈول ترتیب دینا اور دیگر کرکٹ سرگرمیوں کے ساتھ مقابلوں کی تاریخوں میں ہم آہنگی پیدا کرنا شامل ہے۔واضح رہے کہ پاکستان سپر لیگ کے میچز اب تک کراچی، لاہور، ملتان اور راولپنڈی میں منعقد ہوتے رہے ہیں۔ بورڈ کی کوشش ہے کہ مستقبل میں لیگ کے مقابلوں کا دائرہ مزید شہروں تک بڑھایا جائے تاکہ ملک کے مختلف علاقوں کے شائقین کو بھی بڑے کرکٹ ایونٹس دیکھنے کا موقع مل سکے۔
