پاکستان نے بین الاقوامی سطح پر ایک اہم اعزاز حاصل کیا ہے، جہاں قومی اسمبلی کی رکن سیدہ آمنہ بتول کو فیفا کی انسٹی ٹیوشنل ریفارمز کمیٹی کا رکن مقرر کیا گیا ہے۔
یہ پہلا موقع ہے کہ کوئی پاکستانی اس عالمی فٹبال گورننگ باڈی کے اعلیٰ سطحی فورم کا حصہ بنی ہیں۔یہ تقرری نہ صرف پاکستان کے لیے تاریخی سنگِ میل ہے بلکہ بین الاقوامی سطح پر ملک کے کردار اور فٹبال اصلاحات کے اعتراف کی علامت بھی ہے۔ ماہرین کے مطابق اس فیصلے سے پاکستان کے کھیلوں کے اداروں پر اعتماد میں اضافہ ہوگا اور ملک میں فٹبال کے مستقبل کو نئی سمت ملے گی۔سرکاری سطح پر بھی اس پیش رفت کو اہم قرار دیا جا رہا ہے۔ حکومتی نمائندوں کا کہنا ہے کہ یہ کامیابی پاکستان میں فٹبال کے فروغ کے لیے کیے جانے والے اقدامات اور عالمی سطح پر کی جانے والی سفارتی کوششوں کی حقیقی تصویر پیش کرتی ہے۔
سیدہ آمنہ بتول کی شمولیت سے توقع کی جا رہی ہے کہ پاکستان اب عالمی فٹبال پالیسی سازی، اسٹرکچر اور اصلاحاتی عمل میں براہ راست کردار ادا کر سکے گا۔ یہ اہم تعیناتی نئی نسل کے کھلاڑیوں، اسپورٹس مینجمنٹ اور ملکی فٹبال نظام کے لیے بھی نئے مواقع کھولے گی۔شائقین اور ماہرین کا کہنا ہے کہ اس فیصلے سے پاکستان کے فٹبال شعبے کا وقار بڑھے گا اور ملک میں موجود ٹیلنٹ کے لیے نئے دروازے کھلیں گے۔ مجموعی طور پر یہ اعزاز پاکستان کی کھیلوں کی تاریخ میں ایک نمایاں پیش رفت کے طور پر دیکھا جا رہا ہے۔
