مقبوضہ کشمیر میں بچوں کی جیل سے دو پاکستانیوں سمیت تین بچے فرار

 بچوں نے جیل کی بیرک پر تعینات وِنے کمار اور پروین کمار کو زخمی کر دیا 
 بچوں کا تعلق ننکانہ صاحب اور دوسرے کا تعلق دھیر پور مظفرآباد سے ہے 
 بچوں کے بارے میں خدشہ ہے کہ وہ واپس پاکستان جانے کی کوشش کر سکتے ہیں
  سرینگر(آئی این پی ) مقبوضہکشمیر میں لائن آف کنٹرول(ایل او سی)  کے قریبی ضلع رنبیر سنگھ پورہ میں واقع بچوں کے لیے مخصوص جیل (جوِنائل ہوم)  سے تین بچے فرار ہو گئے  ۔بی بی سی رپورٹ کے مطابق پولیس  نے بتایا کہ   ان بچوں نے جیل کی ایک بیرک پر تعینات دو سکیورٹی اہلکاروں وِنے کمار اور پروین کمار پر حملہ کر کے انھیں زخمی کر دیا اور جیل سے فرار ہو گئے۔زخمی اہلکاروں کو ہسپتال منتقل کر دیا گیا ہے۔پولیس کا کہنا ہے کہ فرار ہونے والے بچوں میں سے ایک کا تعلق پاکستان کے صوبہ پنجاب کے علاقے ننکانہ صاحب اور دوسرے کا تعلق دھیر پور تحصیل مظفرآباد سے ہے جبکہ تیسرا نوعمر رنبیر سنگھ پورہ کا مقامی رہائشی ہے۔پولیس کا کہنا ہے کہ فرار ہونے والوں میں شامل دو پاکستانی بچوں کا مسلح عسکریت پسندی کے ساتھ کوئی تعلق نہیں اور انھیں غلطی سے سرحد عبور کرتے وقت گرفتار کیا گیا تھا۔ ایک بیان میں جموں و کشمیر پولیس نے بتایا کہ اس معاملے کی تحقیقات کے لیے خصوصی ٹیم تشکیل دی گئی ہے اور ایل او سی کے قریبی علاقوں میں چوکسی بڑھا دی گئی ہے، کیونکہ پاکستانی بچوں کے بارے میں خدشہ ہے کہ وہ واپس پاکستان جانے کی کوشش کر سکتے ہیں۔