مارچ تک پٹرول اور ڈیزل کی درآمد روک دی جائے:آئل کمپنیاں

پٹرول کا 36 اور ڈیزل کا 39 دن کا سٹاک موجود ہے: کمپنیوں  کا خریداری نہ ہونے پر اوگرا کو خط 
 اسلام آ باد(آئی این پی )آئل مارکیٹنگ کمپنیوں کی جانب سے ڈیزل اور پیٹرول نہ خریدنے کے معاملے پر مقامی ریفائنریز نے اوگرا کو خط لکھا ہے جس میں  پیٹرول اور ڈیزل کی درآمد روکنے کا مطالبہ  کیا گیا  ہے ۔حکومت نے 15 فروری کو پیٹرول اور ڈیزل کی قیمت میں 4 روپے فی لیٹر تک کمی کی تھی، جس کا اطلاق 28 فروری تک ہوگا، یکم مارچ کیلئے نئی قیمتیں جاری کی جائیں گی۔۔خط میں کہا گیا ہے کہ تیل کمپنیوں کے پیٹرولیم مصنوعات نہ خریدنے سے آپریشن چلانے میں مشکلات کا سامنا ہے، پیٹرول کی فروخت میں 20 فیصد اور ڈیزل میں 31 فیصد کمی آئی ہے، اس وقت پیٹرول کا 36 اور ڈیزل کا 39 دن کا اسٹاک موجود ہے۔مقامی ریفائنریز نے مطالبہ کیا ہے کہ مارچ تک پیٹرول اور ڈیزل کی درآمد کو روکا جائے، ملک میں بارش نہ ہونے کی وجہ سے بھی ڈیزل کی کھپت پر فرق پڑا ہے۔