ایرانی خام تیل کی برآمدات کے حوالے سے ایک اہم پیش رفت سامنے آئی ہے، جس کے مطابق تیل کی ترسیل پر نظر رکھنے والی بین الاقوامی ویب سائٹ ٹینکر ٹریکرز نے دعویٰ کیا ہے کہ ایرانی تیل بردار جہاز امریکی بحری ناکہ بندی کے علاقے سے کامیابی کے ساتھ نکل گئے ہیں۔
غیر ملکی خبر رساں ادارے Agence France-Presse (AFP) کے مطابق رپورٹ میں کہا گیا ہے کہ یہ گزشتہ دو ماہ کے دوران ایران کی خام تیل کی پہلی بڑی برآمدات ہیں۔رپورٹ کے مطابق نیشنل ایرانیئن ٹینکر کمپنی کے دو بڑے وی ایل سی سی سپر ٹینکرز، ڈیونا اور ہیرو 2، امریکی بحری گھیرا عبور کر کے خلیجی پانیوں سے باہر نکل گئے ہیں۔بتایا گیا ہے کہ دونوں جہاز مجموعی طور پر تقریباً 38 لاکھ بیرل خام تیل لے کر روانہ ہوئے، جبکہ یہ معلومات سیٹلائٹ تصاویر اور ڈیجیٹل شپنگ ٹریکنگ ڈیٹا کی مدد سے حاصل کی گئی ہیں۔بعد ازاں رپورٹ میں مزید کہا گیا کہ ایک تیسرا ٹینکر بھی اسی ناکہ بندی کی لائن سے گزر چکا ہے، جس میں تقریباً 10 لاکھ بیرل خام تیل موجود تھا۔
ماہرین کے مطابق اگر یہ اطلاعات درست ثابت ہوتی ہیں تو یہ ایران کے لیے ایک اہم معاشی پیش رفت ہو سکتی ہے، خاص طور پر ایسے وقت میں جب خلیجی خطے میں کشیدگی اور آبنائے ہرمز سے متعلق صورتحال نے برآمدات کو متاثر کیا تھا۔تاہم امریکی اور ایرانی حکام کی جانب سے اس رپورٹ پر فوری طور پر کوئی باضابطہ ردعمل سامنے نہیں آیا، جبکہ عالمی توانائی منڈیوں میں اس پیش رفت کو خاص اہمیت دی جا رہی ہے کیونکہ اس سے عالمی تیل کی قیمتوں پر اثرات مرتب ہونے کا امکان ہے۔
