متحدہ عرب امارات کا تحفظ پاکستان کی سلامتی کا لازمی حصہ ہے فیلڈ مارشل

 پاکستان کی مستقل حمایت پر شکریہ ! یہ تعاون دونوں برادر ممالک کے درمیان گہرے تاریخی تعلقات کا مظہر ہے‘ دونوں ممالک کے درمیان دیرینہ تاریخی تعلقات اور مضبوط تزویراتی شراکت داری ہے
پاکستان، یو اے ای میں تاریخی برادرانہ تعلقات،سکیورٹی پر کوئی سمجھوتہ نہیں کیا جائیگا :فیلڈ مارشل  عاصم منیر کی ابو ظبی میں یو اے ای کے نائب حکمران اور مشیر قومی سلامتی شیخ طحنون بن زاید النہیان سے ملاقات میں گفتگو
راولپنڈی (آئی این پی )چیف آف ڈیفنس فورسز فیلڈ مارشل سید عاصم منیر نے کہاہے متحدہ عرب امارات  کی سلامتی اور استحکام پاکستان کی سلامتی کا لازمی جزو ہے،پاکستان اور یو اے ای میں تاریخی برادرانہ تعلقات،سکیورٹی پر کوئی سمجھوتہ نہیں کیا جائیگا۔پاک فوج کے شعبہ تعلقات عامہ (آئی ایس پی آر )کے مطابق فیلڈ مارشل عاصم منیر سے یو اے ای کے نائب حکمران اور مشیر قومی سلامتی شیخ طحنون بن زاید النہیان کی ابو ظبی میں ملاقات ہوئی۔  ملاقات میں باہمی تعاون خصوصا معیشت، سرمایہ کاری اور سلامتی امور پر گفتگو کی گئی اور دونوں رہنمائوں نے خطے کی صورتحال، امن و سلامتی کے فروغ کے لئے مسلسل رابطوں پر زور دیا۔  فیلڈ مارشل نے متحدہ عرب امارات کی جانب سے پاکستان کی مستقل حمایت پر شکریہ ادا کرتے ہوئے کہا یہ تعاون دونوں برادر ممالک کے درمیان گہرے تاریخی تعلقات کا مظہر ہے۔فیلڈ مارشل نے پاکستان میں معاشی و سماجی ترقی کے فروغ میں اماراتی قیادت کے تعمیری کردار کو سراہا اور کہا دونوں ممالک کے درمیان دیرینہ تاریخی تعلقات اور مضبوط تزویراتی شراکت داری ہے۔آئی ایس پی آر کے مطابق چیف آف ڈیفنس فورسز فیلڈ مارشل عاصم منیر کا کہنا تھا متحدہ عرب امارات کی سلامتی اور استحکام پاکستان کی سلامتی کا لازمی جزو ہے۔