پشاور/لاہور: پروونشل ڈیزاسٹر مینجمنٹ اتھارٹی (پی ڈی ایم اے) پنجاب نے مون سون فلڈ فیکٹ شیٹ جاری کرتے ہوئے آئندہ 24 گھنٹوں کے دوران شدید بارشوں کی پیشگوئی کی ہے۔
ترجمان پی ڈی ایم اے کے مطابق بالائی پنجاب میں طوفانی بارشوں اور کلاؤڈ برسٹنگ کے شدید خدشات ہیں۔ پی ڈی ایم اے نے خبردار کیا ہے کہ مون سون بارشوں کا ساتواں اسپیل پہلے کے مقابلے میں زیادہ طاقتور ہے۔
خیبرپختونخوا کی صورتحال:
خیبرپختونخوا میں بارشوں اور سیلاب کی تباہ کاری جاری ہے۔ صوبے میں اب تک سیلاب سے 321 افراد جان کی بازی ہار چکے ہیں۔ بونیر میں گزشتہ روز آنے والا سیلابی ریلا ہر طرف تباہی کے مناظر چھوڑ گیا، جہاں خالی اور تباہ حال مکانات، ملبے کے ڈھیر اور بڑے بڑے پتھر مختلف علاقوں میں موجود ہیں۔
ریسکیو اور امدادی کارروائیاں:
متاثرہ علاقوں میں پی ڈی ایم اے، پاک آرمی، ضلعی انتظامیہ اور مقامی رضاکار ریسکیو اور امدادی کارروائیوں میں مصروف ہیں۔ سیلاب میں جاں بحق ہونے والے افراد کی اجتماعی نمازِ جنازہ بھی ادا کر دی گئی ہے۔ماہرین اور حکام نے عوام سے کہا ہے کہ وہ خطرناک علاقوں میں جانے سے گریز کریں اور حکومت کی ہدایات پر عمل کریں تاکہ کسی مزید انسانی نقصان سے بچا جا سکے۔
